DSMF 7 milyon manat qənaət edib

Bu ilin 6 ayı ərzində qeyri-büdcə təşkilatlarından Dövlət Sosial Müdafiə Fonduna 350 milyon manat vəsait daxil olub. Bu isə ötən ilin müvafiq dövründəkindən 26 milyon manat çoxdur.

Lent.az-ın məlumatına görə, Dövlət Sosial Müdafiə Fondunun sədri Səlim Müslümov bu gün keçirdiyi mətbuat konfransında belə deyib. O qeyd edib ki, ilin ilk yarısı üzrə fondun xərclər hissəsi 99 faiz icra olunub. Bütün xərclər üzrə ödəmələrin icrası isə 98,2 faiz təşkil edib.

“Bizim digər xərclərimizdə 7 milyon manat qənaət yaranıb. Digər xərclərin əsas qənaəti isə fondun saxlanması xərclərinə qənaət olunması və pensiyaların əhaliyə çatdırılması ilə bağlı xərclərin azaldılmasından yaranır. Artıq avqust ayı üçün pensiyaların maliyyələşdirilməsi də başa çatıb. Beləliklə, biz maliyyələşməni tam başa çatdırmışıq və bu gün hesabımızda əlavə olaraq 5 milyon manata yaxın vəsaitimiz var” - deyə, Səlim Müslümov bildirib.

Elxan SALAHOV