Goranboy, Ucar, Ağdaş, Yevlax, Bakının Buzovna, Zığ, Sahil qəsəbələri qazsız qalacaq

Naxçıvanski adına hərbi liseyin, Alabalıq deyilən ərazinin qaz təchizatında da məhdudiyyətlər olacaq

Yeni çəkilmiş daşıyıcı qaz kəmərinin qaz təchizatı mənbəyinə birləşdirilməsi ilə əlaqədar 25 may 2010-cu il tarixdə saat 9.00-dan 16.00-dək Goranboy Qazpaylayıcı Stansiyasından rayonu “mavi yanacaq”la təmin edən orta təzyiqli qaz kəmərinin, həmçinin təmir işləri ilə əlaqədar saat 9.00-dan 18.00-dək Ucar Qazpaylayıcı Staniyasının qaz təchizatı dayandırılacaq.

Lent.az-ın ARDNŞ-in rəsmi saytına istinadən verdiyi məlumata görə, həmin müddət ərzində Goranboy rayonun mərkəzi hissəsinə, eyni zamanda Ucar rayonunun mərkəzi və ətraf kəndlərinə təbii qazın verilişində fasilələr yaranacaq.

Həmin gün qaz ölçü qovşaqlarında diafraqmaların dəyişdirilməsi məqsədi ilə saat 10:00-dan Yevlax-I, Yevlax-II, Ağdaş-I, saat 11:00-dan etibarən isə Şimal, Buzovna və Zığ Qazpaylayıcı Stansiyalarının qaz təchizatı dayandırılacaq. Diafraqma dəyişdirilən müddətdə Ağdaş, Yevlax şəhərlərinin, Sahil qəsəbəsinin, eləcə də Aeroport-2 və C. Naxçıvanski adına hərbi liseyin qaz təchizatında məhdudiyyətlər olacaq.

Bundan əlavə, baş vermiş qaz sızmasının aradan qaldırılması ilə əlaqədar 25 may 2010-cu il tarixdə saat 10.00-dan 18.00-dək Maştağa Qazpaylayıcı Stansiyasından qidalanan “Maştağa–Nardaran” orta təzyiqli 530 mm-lik qaz kəmərinin qaz təchizatı dayandırılacaq. Həmin müddət ərzində Maştağa qəsəbəsinə və Albalıq deyilən əraziyə təbii qazın nəqlində fasilələr yaranacaq.