Sabah əmək yarmarkası keçiriləcək

Karyerada ilk addım atmaq istəyənlər yollarını Qafqaz Universitetindən sala bilər

Sabah Qafqaz Universitetində məzun və tələbələr üçün “Karyerada ilk addım” devizi altında əmək yarmarkası keçiriləcək. Əmək və Əhalinin Sosial Müdafiəsi Nazirliyinin Baş Məşğulluq İdarəsi tərəfindən təşkil olunan tədbirdə Bakı və Sumqayıt şəhərlərində, Abşeron rayonunda fəaliyyət göstərən 91 müəssisə və təşkilat 720-yə yaxın ixtisaslaşmış iş yerləri ilə iştirak edəcəklər.

Nazirliyin mətbuat xidmətindən Lent.az-a bildiriblər ki, tədbirdə Bakı şəhər Məşğulluq İdarəsinin məlumat bazasında mövcud olan iş yerləri də məzun və tələbələrin sərbəst seçiminə buraxılacaq. Tədbirdə həmçinin məzun və tələbələrin müvəqqəti xarakterli işlə təmin olunması məqsədi ilə “Əmək Birjası”da iştirak edəcək. Məqsəd iş adamlarına (sahibkarlara) gələcək kadrların seçiminin aparılmasına köməklik göstərmək və eyni zamanda məzun və tələbələrin ixtisasları üzrə boş iş yerləri haqqında məlumat almalarına köməklik göstərməkdir.

Nazirlikdə bildirirlər ki, 2007-ci ildən başlayaraq Baş Məşğulluq İdarəsi və onun yerli orqanları tərəfindən Bakı, Gəncə, Lənkəran və Mingəçevir şəhərlərinin ali təhsil ocaqlarının məzun və tələbələrinin əmək bazarına inteqrasiyası məqsədi ilə “Karyerada ilk addım” devizi altında tədbirlər təşkil olunaraq həyata keçirilir. Keçirilən tədbirlər nəticəsində 2009-cu ildə 470 müəssisə 2351 boş iş yerləri ilə iştirak edib. Nəticədə 431 nəfər məzun və tələbə işlə təmin olunub, 256 nəfər peşə hazırlığı kurslarına cəlb olunmaları məqsədi ilə qeydiyyata alınıb, 5755 nəfər məzun və tələbə tərəfindən müəssisələrə şəxsi məlumatlar təqdim olunub. Bundan başqa ötən il müvəqqəti xarakterli işlərlə təmin olunmaq məqsədilə 201 nəfər məzun və tələbə Əmək Birjalarında qeydiyyata alınıb.

Məzun və tələbələr üçün növbəti tədbirin mayın 26-da Texniki Universitetin İdman sarayında keçirilməsi planlaşdırılır.

Elxan SALAHOV