Magistr imtahanları regionlarda da keçirilə bilər

Bu, daha çox imtahanda iştirak edəcək kontingentin sayından asılı olacaq

Bu il ilk dəfə olaraq, ali məktəblərin magistratura pilləsinə qəbul imtahanlarını regionlarda da keçiriləcək. Artıq bu istiqamətdə hazırlıq işlərinə başlanılıb, Tələbə Qəbulu üzrə Dövlət Komissiyasının (TQDK) regional bölmələrində təşkilati məsələlər həll olunub.

Lent.az-ın məlumatına görə, bu barədə TQDK sədri Məleykə Abbaszadə 2010/2011-ci tədris ili üçün ali məktəblərin magistraturalarına qəbul qaydalarına dair keçirdiyi mətbuat konfransında bildirib. O, qeyd edib ki, bildirib. O deyib ki, TQDK ali məktəblərin bakalavr pilləsinin I ixtisas qrupunun qəbul imtahanları kimi, magistraturaya qəbul imtahanlarını da regionlarda keçirilməsinin tərəfdarıdır: “Naxçıvanda qəbul imtahanları həmişə keçirilib. Biz bunun digər bölgələrdə də keçirməyin tərəfdarıyıq”.

Bununla belə, TQDK sədri magistraturaya qəbul imtahanlarının regionlarda da keçirilib-keçirilməyəcəyinin hələ tam dəqiqləşmədiyini deyib. Onun sözlərinə görə, bu, sənəd qəbulu prosesi başlayandan sonra dəqiqləşəcək. Məleykə Abbaszadənin fikrincə, magistraturaya qəbul imtahanlarının regionlarda keçirilməsi daha çox kontingentin sayından asılı olacaq.

Elxan SALAHOV