Azərbaycanda yeni qəzet nəşrə başlayır

Yanvarın 16-dan etibarən Azərbaycanda daha bir mətbuat orqanı işıq üzü görəcək. Lent.az-ın məlumatına görə, ilk nömrəsi üç il əvvəl Rusiyada – Moskva şəhərində çap olunan “Salam Press” qəzetinin mövzu əhatəsi tək Azərbaycan yox, bütün dünyada yaşayan Azərbaycanlıların fəaliyyəti və onların yaşadıqları ölkələrdə baş verən önəmli ictimai-siyasi məqamlar olacaq.

Baş redaktor Tariyel Süleymanın verdiyi məlumata görə “Salam Press” qəzetinin səhifələrindən oxucular həm Azərbaycan, həm də dünyada baş verən yeniliklərlə bağlı məlumatlar almaqdan savayı, maraqlı müsahibələrlə, analitik yazılar, iqtisadi, ictimai-siyasi xarakterli proqnozlarla da tanış ola biləcəklər. Qəzet eyni zamanda öz səhifələrini Azərbaycanın aktual problemlərinin həlli yollarının araşdırılması mövzusunda diskussiya müstəvisinə çevirməyi planlaşdırır.

Qeyd edək ki, “Salam Press” qəzeti Bakı nəşri ilə paralel Moskva şəhərində də həftəlik nəşrini davam etdirəcək. İlkin olaraq 16 səhifə A 3 formatla rəngli formada nəşr olunacaq qəzet həftənin şənbə günləri satışa çıxarılacaq.