TQDK zonalarda müşavirə keçirəcək

Həmin müşavirələrdə qəbul imtahanlarının elmi-statistik təhlili ətrafında müzakirələr aparılacaq

Tələbə Qəbulu üzrə Dövlət Komissiyası 2009/2010-cu tədris ili üçün ali məktəblərə qəbul imtahanlarının elmi-statistik təhlilinə həsr olunmuş ənənəvi zona müşavirələrinə başlayır.

TQDK-nın mətbuat xidmətindən Lent.az-a bildiriblər ki, respublikanın müxtəlif bölgə mərkəzlərində keçiriləcək bu müşavirələrdə komissiya ilə yanaşı Təhsil Nazirliyinin, Milli Elmlər Akademiyasının, müxtəlif ali, orta ixtisas və orta təhsil müəssisələrinin rəhbərləri, nümayəndələri iştirak edəcəklər. Müşavirələrdə müvafiq bölgə üzrə ayrı-ayrı şəhər və rayonların orta məktəb məzunlarının qəbul imtahanlarında göstərdikləri nəticələr geniş müzakirə olunacaq.

Xatırladaq ki, 2009/2010-cu tədris ili üçün tələbə qəbulunun nəticələrinin elmi-statistik təhlili nəticəsində əldə olunmuş zəngin elmi materiallar ”Abituriyent” jurnalının 12-ci sayında dərc edilmiş və həmin nəşrin elektron variantı http://www.abıturient.az internet səhifəsində yerləşdirilib.

Bununla yanaşı, respublikanın bütün şəhər və rayonları üzrə 2009-cu il məzunlarının qəbul imtahanlarındakı nəticələrinə dair xüsusi statistik məlumat kitabçaları hazırlanıb. Burada müvafiq bölgənin məzunlarının imtahan fənləri üzrə göstəriciləri, topladıqları ballar haqqında məlumatlar, onlardan ayrı-ayrı təhsil ocaqlarına qəbul olanların sayı, bölgənin hər bir məktəbini təmsil edən orta statistik abituriyentin nəticələri və qəbulolma göstəriciləri öz əksini tapıb. Bu kitabçalar ölkənin təhsil şöbələrinə və orta məktəblərinə təmənnasız paylanacaq.
Zona müşavirələrinin keçirilmə cədvəli:

S/s	Bölgə mərkəzi	Bölgəyə daxil olan rayonlar	Tarix	Yer
	Sumqayıt	Sumqayıt, Abşeron, Dəvəçi, Qobustan, Quba, Qubadlı, Qusar, Şamaxı, Siyəzən, Xaçmaz, Xızı	06.01.2010 saat 11-00	Əqli və fiziki cəhətdən qüsurlu uşaqlar üçün internat məktəbi
	Naxçıvan	Naxçıvan, Babək, Culfa, Kəngərli, Ordubad, Şahbuz, Sədərək, Şərur	07.01.2010 saat 11-00	“Gənclik” mərkəzi
	Lənkəran	Lənkəran, Astara, Beyləqan, Biləsuvar, Cəlilabad, Hacıqabul, İmişli, Lerik, Masallı, Neftçala, Saatlı, Sabirabad, Salyan, Şirvan, Cəbrayıl, Yardımlı	07.01.2010 saat 12-00	Lənkəran Dövlət Dram Teatrı
	Şəki	Şəki, Qax, Ağdaş, Ağsu, Balakən, İsmayıllı, Oğuz, Qəbələ, Zaqatala, Zərdab	11.01.2010 saat 12-00	İcra Hakimiyyətinin binası
	Gəncə	Gəncə, Ağcabədi, Ağdam, Bərdə, Daşkəsən, Fizuli, Goranboy, Göyçay, Kəlbəcər, Kürdəmir, Samux, Tərtər, Ucar, Göygöl, Mingəçevir, Naftalan, Yevlax, Laçın	28.01.2010 saat 12-00	Azərbaycan Dövlət Aqrar Universiteti
	Ağstafa	Ağstafa, Gədəbəy, Qazax, Şəmkir, Tovuz	29.01.2010 saat 11-00	Heydər Əliyev Mərkəzi
	Bakı	Binəqədi, Əzizbəyov, Nərimanov, Nəsimi, Nizami, Qaradağ, Sabunçu, Səbail, Suraxanı, Xətai, Yasamal, Şuşa, Zəngilan, Xocalı, Xocavənd	03.02.2010 saat 11-00	Nəsimi rayonu 1 saylı orta məktəb