Ramil Usubov mərakeşli həmkarını qəbul edib

Azərbaycanın daxili işlər naziri, general-polkovnik Ramil Usubov Bakıda “Terrorizmin qarşısının alınmasında əməkdaşlığın gücləndirilməsi” mövzusunda keçirilən beynəlxalq konfransda iştirak edən Mərakeş Krallığının daxili işlər naziri Mohand Lanserin başçılıq etdiyi nümayəndə heyətini qəbul edib.

DİN mətbuat xidmətindən Lent.az-ya verilən məlumata görə, qonaqları səmimiyyətlə salamlayan nazir Bakıda keçirilən məlum konfransın böyük əhəmiyyət daşıdığını xatırladaraq terrorizmdən əziyyət çəkən ölkələrdən biri kimi Azərbaycan üçün bu məsələnin aktual olduğunu, sözügedən qlobal xarakterli bəlaya qarşı yalnız birgə səylərlə mübarizə aparılmasının mümkünlüyünü vurğulayıb.

Nazir müstəqilliyin ilk illərində qarşılaşdığımız problemlər, Ermənistanın təcavüzkarlıq siyasəti nəticəsində ərazi bütövlüyümüzün pozulması, torpaqlarımızın işğalı, ulu öndər Heydər Əliyevin xalqın təkidli tələbi ilə hakimiyyətə qayıdışından sonra cinayətkarlıqla mübarizə və ictimai asayişin qorunması sahəsində qazanılan uğurlardan, əməliyyat şəraitinin nəzarət altında olduğundan danışıb.

Daxili işlər naziri respublikamızın Mərakeş ilə əlaqələrinin yaranmasının 1994-cü ildə ümummilli liderimiz Heydər Əliyevin İslam Konfransı Təşkilatının zirvə toplantısında iştirak etmək məqsədilə həmin ölkəyə səfər etməsindən sonraya təsadüf etdiyini xatırladıb.

Daha sonra "Azərbaycan Respublikasının Hökuməti və Mərakeş Krallığının Hökuməti arasında təhlükəsizlik və cinayətkarlıqla mübarizədə əməkdaşlığa dair Saziş" layihəsinin hazırlanaraq razılaşdırılması məqsədi ilə Mərakeş tərəfinə təqdim edildiyi, həmin sənədin qəbulunun iki ölkənin müvafiq strukturları, o cümlədən Daxili İşlər nazirlikləri arasında əməkdaşlığın daha da genişləndirilməsinə imkan verəcəyi bildirilib.

Transmilli mütəşəkkil cinayətkarlıqla mübarizədə səylərin birləşdirilməsinin əhəmiyyəti qeyd edilib və bildirilib ki, qarşılıqlı faydalı əlaqələrin inkişafı ölkələrimizin və xalqlarımızın mənafelərinə, beynəlxalq təhlükəsizliyin təmini işinə xidmət edərdi.

Mərakeş Krallığının daxili işlər naziri Mohand Lanser səmimi qəbula və ətraflı məlumata görə təşəkkürünü bildirmiş, ölkəsindəki kriminogen durumla bağlı qısa məlumat vermiş, transmilli mütəşəkkil cinayətkarlıqla mübarizədə bütün dövlətlərin, o cümlədən beynəlxalq təşkilatların səylərinin birləşdirilməsinin zəruriliyi barədə cənab Ramil Usubovun mövqeyini bölüşdüyünü vurğulayıb.

Səmimilik və mehribanlıq şəraitində keçən görüşdə Azərbaycanın Mərakeş Krallığındakı səfiri Tarik Əliyev və həmin ökənin respublikamızdakı səfiri Hassan Hami iştirak ediblər.