Nika Gilauri: “Azərbaycan bizim ən vacib strateji tərəfdaşımızdır”

Bu gün Gürcüstanın baş naziri Nika Gilauri 2011-ci ilin sosial-iqtisadi yekunlarına həsr olunmuş mətbuat konfransı keçirib.

APA-nın Gürcüstan bürosunun xəbərinə görə, baş nazir əvvəlcə jurnalistləri Yeni il münasibətilə təbrik edib.

N.Gilauri bildirib ki, Gürcüstanda baş verən siyasi dəyişikliklər iqtisadi sahədə də özünü göstərib: “Ötən illə müqayisədə bu il Gürcüstanda 6% iqtisadi artım qeydə alınıb. Energetika, turizm və bankçılıq sahələrində inkişaf müşahidə olunub, 5 hidroelektrik stansiya tikilib. Daşınmaz əmlak bazarında və birbaşa investisiyaların həcmində isə azalma qeydə alınıb”.

Baş nazir Gürcüstanda korrupsiyanın hazırda ən aşağı səviyyəyə endirildiyini bəyan edib: “Yanvarın 1-dən ölkədə yeni Vergi Məcəlləsi qüvvəyə minəcək ki, bu da azad sahibkarlığın inkişafını sürətləndirəcək. İnanıram ki, 2011-ci il Gürcüstan üçün inkişaf, tərəqqi ili olacaq, ölkəmizdə işsizliklə mübarizə sürətlənəcək və yeni iş yerləri açılacaq”.

N.Gilauri APA-nın sualına cavab olaraq bildirib ki, Gürcüstanın iqtisadi inkişafında Azərbaycan əhəmiyyətli rol oynayır: “Azərbaycan bizim ən vacib strateji tərəfdaşımız, Gürcüstanın enerji təhlükəsizliyinin təminatçısıdır. “SOCAR-Georgia” Gürcüstanın ən böyük vergi ödəyicilərindən biridir. Azərbaycan şirkətləri Gürcüstan iqtisadiyyatında böyük paya malikdir. Eyni zamanda Gürcüstan Azərbaycanın energetika sahəsi üçün Avropaya açılan bir pəncərədir”.

Rusiya-Ermənistan qaz kəmərinin özəlləşdirilməsi ilə bağlı sualı cavablandıran baş nazir qeyd edib ki, bu kəmər Gürcüstanın mülkiyyətidir: “Ona görə də Rusiya-Ermənistan qaz kəməri heç vaxt özəlləşdirilməyəcək. Nə vaxtsa kəmərin səhmlərinin 15%-ni London birjasında satışa çıxara bilərik”.