“Xocalıya Ədalət” naminə online aksiyaya start verilir

Dialoq və Əməkdaşlıq Uğrunda İslam Konfransı Təşkilatı Gənclər Forumu (İKGF) ilə “Azərbaycan Respublikasının Dağlıq Qarabağ bölgəsinin Azərbaycanlı icması” İctimai Birliyi sabah “Xocalıya ədalət” beynəlxalq təşviqat kampaniyasının onlayn fəaliyyətlərinin təqdimatına həsr olunmuş tanıtma tədbiri keçirəcək.

İKGFdən Lent.az-a verilən məlumata görə, tədbir 10 dekabr İnsan Hüquqları Günü həftəsinə həsr olunur. Tədbir çərçivəsində Mədəniyyətlərarası Dialoq üzrə Baş Koordinator Leyla Əliyevanın təşəbbüsü ilə həyata keçirilən “Xocalıya Ədalət” kampaniyasının yeni internet saytı ictimaiyyətə təqdim ediləcək. Həmçinin, kampaniyanın Facebook, Twitter və Youtube kimi sosial şəbəkələrdəki fəaliyyəti barədə məlumat veriləcək.

İKGF qeyd edir ki, “Xocalıya ədalət” kampaniyası çərçivəsində 2 il ərzində dünyanın 50-yə yaxın ölkəsində müxtəlif xarakterli tədbirlər və aksiyalar keçirilmişdir. Kampaniyanın fəaliyyətini əlaqələndirən İKGF-nin təşəbbüsü ilə bu il ərzində İKT üzv dövlətləri Parlament Birliyi və İKT Xarici İşlər Nazirlərinin Konfransı tərəfindən qəbul edilən qətnamələrdə Xocalı qırğını “insanlığa qarşı cinayət” kimi qiymətləndirilib. ABŞ-da tanınmış repçi Toni Bləkman və Azərbaycanın rep qrupu “Dəyirman” tərəfindən ifa edilmiş “Xocalıya ədalət” rep üslublu mahnının təqdimatı Xocalı faciəsi həqiqətlərinin dünyada yayılmasında xüsusi rol oynayıb. Hazırda kampaniya çərçivəsində Xocalı soyqırımına dünya ictimaiyyəti tərəfindən hüquqi-siyasi qiymət verilməsi məqsədilə hazırlanmış petisiyaya beynəlxalq imzatoplama aksiyası keçirilir. http://justiceforkhojaly.org/?p=petition