Ramil Usubov Riçard Morninqstarı qəbul edib

Daxili İşlər Nazirliyinin mətbuat xidmətindən Lent.az-a verilən məlumata görə, Ramil Usubov Riçard Morninqstarı yeni təyinat münasibətilə təbrik edib və bu təyinatın Azərbaycanla ABŞ arasında qarşılıqlı əlaqələrin daha da inkişafına təkan verəcəyini söyləyib.

Ramil Usubov görüşdə Daxili İşlər Nazirliyinin strukturu, funksiyaları və fəaliyyət istiqamətləri barədə danışıb. O, müstəqilliyin ilk illərində cərəyan edən gərgin ictimai-siyasi hadisələr, Ermənistanın təcavüzü, kriminogen durumun nəzarətdən çıxması, vətəndaş müharibəsi təhlükəsi, xalqın tələbi ilə Heydər Əliyevin ali hakimiyyətə qayıdışı və bundan sonra cəmiyyət həyatının bütün sahələrində, o cümlədən hüquq-mühafizə sahəsində həyata keçirilən islahatlar barədə ətraflı məlumat verib. Polisin fəaliyyətinin beynəlxalq standartlara uyğun təkmilləşdirilməsi, xarici ekspertlərin yaxından iştirakı ilə yeni normativ-hüquqi bazanın yaradılması və digər sahələrdə görülən işləri diqqətə çatdıran Ramil Usubov Daxili İşlər Nazirliyi və onun müvafiq qurumları ilə ABŞ səfirliyi arasında əməkdaşlığın son illər daha da möhkəmlənməsindən razılığını ifadə edib.

Riçard Morninqstar səmimi qəbula və ətraflı məlumata görə minnətdarlığını bildirib. O, Bakıda ilk dəfə 1995-ci ildə olduğunu xatırladaraq, ötən müddətdə Azərbaycanın inanılmaz dərəcədə inkişaf etdiyini və dəyişdiyini söyləyib. Riçard Morninqstar fəaliyyəti dövründə ölkələrimiz, o cümlədən ABŞ səfirliyi ilə Daxili İşlər Nazirliyi arasında əməkdaşlığın daha da genişləndirilməsi üçün hər cür səylər göstərəcəyini bildirib.

Səmimi və işgüzar şəraitdə keçən görüşdə qarşılıqlı maraq doğuran bir sıra digər məsələlər də müzakirə olunub.