Bədən temperaturu yuxunun tənzimlənməsində mühüm rol oynayır.
Lent.az xarici mediaya istinadla məlumat verir ki, normal şəkildə yuxuya getmək üçün otaq sərin olmalıdır və temperaturun hər hansı yüksəlməsi yuxuya getməni çətinləşdirə, yuxunun keyfiyyətini pisləşdirə bilər.
Dərin yuxunun əhəmiyyəti
Dərin yuxu yuxunun ən bərpaedici mərhələsidir. Məhz bu vaxt beynin “təmizlənməsi”, orqanizmdə toxumaların bərpası baş verir və enerji səviyyəsinə, maddələr mübadiləsinə və immunitetə təsir edən əsas hormonlar tənzimlənir. Kifayət qədər dərin yuxu olmadıqda, insanlar tam yatdıqlarını düşünsələr belə, tez-tez yorğun halda oyanırlar. İnsanlar dərin yuxunun böyük hissəsini gecənin ilk yarısında keçirirlər. Buna görə də yuxuya getməyə və uzunmüddətli yuxuya düzgün hazırlıq istirahət hissi üçün əsas açardır.
Temperaturun yuxuya təsiri
Bədən temperaturu ilə yuxu-oyanıqlıq dövrü sirkadiyal ritm vasitəsilə əlaqəlidir. Bu ritm bədən temperaturunu idarə edir: yuxudan əvvəl və yuxu zamanı temperatur aşağı düşür ki, bu da istirahətə şərait yaradır, gün ərzində isə tədricən yüksələrək günorta və axşam saatlarında pik həddə çatır və aktivlik siqnalı verir.
Yuxudan əvvəl bədən temperaturunun azalması bioloji rahatlama siqnalıdır və bir sıra proseslərə təsir edir. Sərin mühit parasimpatik sinir sistemini güclü şəkildə aktivləşdirir, bu sistem rahatlama siqnalı verir, kortizol kimi stress hormonlarının səviyyəsini azaldır, ürəyi sakitləşdirir və ürək döyüntüsünü yavaşıdır. Yuxuya getmək üçün otaqda rahat temperatur 16-20 dərəcə hesab olunur.
Temperaturanı yaxşılaşdırmaq üçün üsullar
Alnınıza nəm dəsmal qoyun
Soyuq, nəm dəsmal bədən temperaturunun daha tez enməsinə kömək edə bilər. Yuxuya gedərkən orqanizmi sərinlətmək üçün alnınızı və gözlərinizi sərin nəm dəsmal və ya salfetlə örtün.
İlıq vanna və ya duş qəbul edin
Düzgün seçilmiş ilıq vanna və ya duş yuxudan əvvəl bədən temperaturunu yumşaq şəkildə azaltmağa kömək edə bilər. İlıq vanna və duş əvvəlcə bədən temperaturunu müvəqqəti artırır, daha sonra istiliyin dəri vasitəsilə çıxmasına şərait yaradır. Bu isə temperaturun enməsinə, rahatlamağa və yuxululuq hissinin yaranmasına səbəb olur. İlıq vanna və ya duş üçün ideal vaxt yatmazdan ən azı bir saat əvvəldir.
Corabla yatın
Ayaqların isinməsi ayaq nahiyəsində qan damarlarının genişlənməsinə səbəb olur və bu da istiliyin bədənin mərkəzindən ətraflara doğru yayılmasına imkan verir. Bədənin mərkəzi nə qədər sərin olarsa, beyinə “yatmaq vaxtıdır” siqnalı bir o qədər güclü ötürülür.
Hava axınını yaxşılaşdırın
Yataq otağında hava dövranını artırmaq üçün ventilyatordan istifadə edə və ya pəncərəni aça bilərsiniz. Əgər istiliyi saxlayan ağır yorğanlardan və ya yaddaş köpüklü döşəklərdən istifadə edirsinizsə, onları dəyişdirməyi düşünün. Məsələn, bambuk və ya pambıq çarşaflara üstünlük vermək olar.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
