Mütəxəssislər xəbərdarlıq edirlər ki, şərabın heç bir miqdarı sağlamlıq üçün həqiqətən faydalı hesab oluna bilməz. Buna görə də bu içkinin istifadəsinə ehtiyatla yanaşmaq lazımdır.
Lent.az xarici mediaya istinadla xəbər verir ki, gündə hətta bir qədəh şərab belə ömür uzunluğuna təsir göstərə bilər, daha əvvəlki tədqiqatlar şərab istifadəsinin müəyyən üstünlüklərini qeyd edirdi.
Qeydiyyatdan keçmiş dietoloq və nutrisialogiya üzrə magistrant Sapna Peruvemba bildirib ki, erkən nəzəriyyələr qırmızı şərabın müntəzəm istifadəsini ürək sağlamlığı üçün qoruyucu təsirlə əlaqələndirirdi.
Bununla belə, sual yaranır: sağlamlıq baxımından hansı şərab daha yaxşıdır qırmızı, yoxsa ağ?
Qırmızı və ağ şərab: hansının faydası daha çoxdur?
Qırmızı və ağ şərabdan əldə oluna bilən potensial faydalar onların hazırlanma üsulundan asılı olaraq fərqlənir.
Qırmızı şərabın fermentasiyası zamanı üzümün qabığı, toxumları və saplaqları saxlanılır və antioksidantların böyük hissəsi məhz bu hissələrdə toplanır.
Ağ şərabda isə qabıq və toxumlar fermentasiyadan əvvəl çıxarılır, nəticədə qoruyucu bitki birləşmələrinin böyük hissəsi itirilir. Bu qoruyucu birləşmələrə resveratrol, katexin, epikatexin, kversetin, taninlər və antosianlar kimi antioksidantlar daxildir. Hesab edilir ki, bu maddələr iltihabın azalmasına, immun sisteminin güclənməsinə və sağlam qocalmaya töhfə verir. Lakin onların miqdarı baxımından qırmızı şərab üstünlük təşkil edir.
Ağ şərablarda resveratrolun miqdarı qırmızı şərabla müqayisədə təxminən 10 dəfə azdır. Bu yüksək konsentrasiya belə giləmeyvə və ya üzümü təbii formada qəbul edərkən əldə edilən antioksidant miqdarı ilə müqayisədə çox azdır.
Baxam qeyd edir ki, şərabda terapevtik təsir göstərə biləcək qədər resveratrol almaq üçün standart porsiyadan qat-qat çox şərab içmək lazım gələrdi və bu da sağlamlıq üçün mənfi nəticələrə səbəb olar.
Şərab həqiqətən sağlamlıq üçün faydalıdırmı?
Antioksidantların mövcudluğuna baxmayaraq, mütəxəssislər şərabı sağlamlıq üçün faydalı hesab etməyin şişirtmə olduğunu bildirirlər. Peruvemba vurğulayır ki, şərabın heç bir miqdarı sağlamlıq üçün faydalı sayıla bilməz. Əgər kimsə şərab içməyi seçirsə, bunu sağlamlıq naminə deyil, sadəcə zövq aldığı üçün etməlidir. Baxam da bu fikirlə razılaşaraq qeyd edib ki, bəziləri şərabın ürək üçün faydalı olduğunu düşünsə də, müntəzəm fiziki aktivlik və qida rasionunda lifin artırılması alkoqolun xərçəng riskini yüksəltməsi təhlükəsi olmadan ürək sağlamlığını yaxşılaşdıra bilər. Bu baxımdan qırmızı və ağ şərab arasında ciddi fərq yoxdur.
Alkoqolun mövcudluğu səbəbindən hər iki şərab növü ümumi xərçəng riskinə eyni təsir göstərir, baxmayaraq ki, qırmızı şərab texniki baxımdan daha çox “faydalı” birləşmələr ehtiva edir.
Peruvemba xatırladıb ki, bu birləşmələrin olması alkoqolun Ümumdünya Səhiyyə Təşkilatı tərəfindən hələ də 1-ci qrup kanserogen kimi təsnif edildiyi faktını dəyişmir.
Kimlər alkoqoldan uzaq durmalıdır?
Mütəxəssislər hesab edirlər ki, alkoqol bir çox insan üçün qəbul edilə bilsə də, bəzi şəxslər tamamilə ondan imtina etməlidir. Bunlara aşağıdakılar daxildir:
hamilə olanlar, hamilə qalmağa çalışanlar və ya süd verən analar;
qaraciyər xəstəlikləri olanlar;
ürək-damar xəstəlikləri olanlar;
mədə-bağırsaq sistemi problemləri yaşayanlar;
alkoqolla qarşılıqlı təsirə girən bəzi dərmanlar qəbul edənlər;
şəxsi və ya ailə tarixçəsində alkoqoldan sui-istifadə halları olanlar;
xərçəng riski yüksək olanlar.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
