DÜNYADA BİR İLK: Ana bətnində beyin əməliyyatı

ABŞ-da alimlər xüsusi genetik xəstəliyə malik 34 həftəlik körpənin insultla doğulma riskinin qarşısını almaq üçün ana bətnində olarkən beyin əməliyyatı keçiriblər.

Lent.az xarici KİV-ə istinadən xəbər verir ki, ABŞ-da hamilə qadının 30 həftəlik körpəsində "Galen damarının qüsuru" adlı genetik xəstəlik olduğu müəyyən edilib.

Hər 60 min körpədən birində görülən bu xəstəlik, insanın ömür boyu sağlamlıq problemləri ilə yaşamasına səbəb olur. Bu beyindəki arteriyalar qanı kapilyarların yerinə birbaşa venalara axıdarkən baş verir. Beləliklə, ürək qanla dolur və təhlükəli dərəcədə yüksək qan təzyiqi yaradır. Eyni zamanda, onların 11 yaşından əvvəl ölüm riski 30 faizdir.

Boston Uşaq Xəstəxanası və Massaçusets Xəstəxanasından 10 nəfərlik həkim qrupu bu körpəni ana bətnində əməliyyat etmək qərarına gəlib. Hamiləliyin 34-cü həftəsində əməliyyat olunub. Körpənin ana bətnində olan beynində bu xəstəliklə bağlı ilk əməliyyat kimi ədəbiyyata daxil olan cərrahi prosedur müvəffəqiyyətlə nəticələnib.

Əməliyyatdan iki gün sonra körpə heç bir problem olmadan dünyaya gəlib. 1,9 kiloqram doğulan körpə xəstəxanada müşahidə altında saxlanılıb. Doğulduqdan sonra körpənin beynində qan axınında anormallıq müşahidə olunmayıb. Altı həftəlik körpənin səhhətinin yaxşılaşdığı, kökəldiyi, iştahının yaxşı olduğu açıqlanıb.