Azərbaycan-İspaniya işgüzar görüşü keçirilib
13 iyun 2013 17:50 (UTC +04:00)

Azərbaycan-İspaniya işgüzar görüşü keçirilib

İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-İspaniya işgüzar görüşü keçirilib.

 

İqtisadi İnkişaf Nazirliyinin mətbuat xidmətindən Lent.az-a verilən məlumata görə, tədbirdə Azərbaycan və İspaniya tərəfindən rəsmi şəxslərlə yanaşı, suvarma sistemlərinin, dəmir yolu avadanlıqlarının, tibbi ləvazimatların, hidravlik qurğuların, biokimya məhsullarının istehsalı, ətraf mühitin mühafizəsi və başqa sahələrdə fəaliyyət göstərən 60-dan çox iş adamı iştirak edib.

 

AZPROMO rəhbəri Rüfət Məmmədov Azərbaycanın qazandığı iqtisadi uğurlar, əlverişli biznes və investisiya mühiti, həyata keçirilən iri layihələr barədə məlumat verib. O, Azərbaycanın xarici investisiyalar üçün əlverişli və cəlbedici ölkə, eləcə də investisiya ixracatçısı olduğunu vurğulayaraq ispan iş adamlarını əməkdaşlığa dəvət edib. İspaniya Şirkətlərinin Beynəlmiləlləşdirilməsi Qurumunun baş direktoru İsaak Martin İspaniya iqtisadiyyatı barədə məlumat verib, hər iki ölkənin iqtisadi potensialından səmərəli istifadənin, iş adamları arasında əlaqələrin genişlənməsinin İspaniya -Azərbaycan iqtisadi-ticarət əməkdaşlığının inkişafında əhəmiyyətini diqqətə çatdırıb. Rüfət Məmmədov iqtisadi əlaqələrin inkişafı istiqamətlərini vurğulayıb, iqtisadiyyatın müxtəlif sahələrində əməkdaşlıq üçün böyük imkanların olduğunu bildirib.

 

AZPROMO-nun İnvestisiyaların təşviqi departamentinin direktoru Natiq Mədətov Azərbaycanın investisiya mühiti və biznes imkanlarına dair təqdimatla çıxış edib.

# 480
avatar

Oxşar yazılar