“Bakı Fond Birjası”nın sədri dəyişdi

Ümumi Yığıncağa qədər Dövlət Komitəsinin şöbə rəhbəri “Bakı Fond Birjası”-na rəhbərlik edəcək

Bu gün “Bakı Fond Birjası” QSC-nin (BFB) Müşahidə Şurasının iclası keçirilib.

BFB-dən Lent.az-a verilən məlumata görə, iclasda BFB-nin İdarə Heyətinin sədri Emin Əliyevin başqa işə keçməsi ilə əlaqədar işdən azad edilməsi haqqında ərizəsi müzakirə edilib.

Müşahidə Şurasının qərarı ilə səhmdarların Ümumi Yığıncağı çağırılanadək BFB-nin İdarə Heyəti Sədrinin səlahiyyətlərinin icra edilməsi Emin Muradova həvalə edilib. BFB–nin səhmdarlarının Ümumi Yığıncağının martın 29-da keçirilməsi qərara alınıb.

Qeyd edək ki, 1981-ci ildə anadan olan Emin Muradov 1999-2003-cü illərdə Boğaziçi Universitetində Menecment və İqtisadiyyat üzrə bakalavr təhsili, 2003-2005-ci illərdə Mərkəzi Avropa Universitetində, 2005-2007-ci illərdə isə Texas Universitetində İqtisadiyyat üzrə magistr təhsili alıb. 2007-ci ildə bank sistemində əmək fəaliyyətinə başlayan Emin Muradov 2010-cu ildən etibarən isə Qiymətli Kağızlar üzrə Dövlət Komitəsinin Tədqiqatlar və bazarın inkişafı şöbəsinə rəhbərlik edib.