Mərkəzi Bankda yeni Hesablar Planının tətbiqinə dair seminar keçirilir

Azərbaycan Respublikası Mərkəzi Bankı "Ernst & Young" beynəlxalq audit şirkətinin iştirakı ilə yeni "Azərbaycan Respublikasının bank sistemi üçün Hesablar Planı və onun tətbiqinə dair Göstərişlər"ə dair seminar keçirir.

Bankdan Lent.az-a verilən məlumata görə, beş günlük davam edəcək seminar "Ernst & Young" şirkətinin və Mərkəzi Bankın Maliyyə idarəetməsi departamentinin mütəxəssisləri tərəfindən aparılacaq.

Seminar zamanı Azərbaycan Respublikasının bank sistemi üçün Hesablar Planı və onun tətbiqinə dair Göstərişlər, o cümlədən Maliyyə Hesabatlarının Beynəlxalq Standartlarında bankların maliyyə hesabatlığına təsir edə biləcək son yeniliklər də müzakirə ediləcək.

Seminarda Azərbaycanda fəaliyyət göstərən kommersiya banklarının maliyyə menecerləri, mühasibat uçotu sahəsində məsul şəxslərlə yanaşı Mərkəzi Bankın müvafiq departamentlərinin əməkdaşları da iştirak edirlər.

Qeyd edək ki, Mərkəzi Bank tərəfindən bank sistemində mühasibat uçotunun ən qabaqcıl praktikaya uyğun təkmilləşdirilməsi istiqamətində aparılan tədbirlər çərçivəsində "Ernst & Young" şirkəti ilə birgə yeni "Azərbaycan Respublikasının bank sistemi üçün Hesablar Planı və onun tətbiqinə dair Göstərişlər" hazırlanmış və onun tətbiqi 01 yanvar 2013-cü ildən nəzərdə tutulur.