Hindistanın Milli Neft Şirkəti Bakıda ofis açacaq

Oktyabrın 23-də ARDNŞ-in prezidenti Rövnəq Abdullayev ilə ABŞ-ın “Hess” Korporasiyasının və Hindistanın Milli Neft Şirkətinin nümayəndələri arasında görüş olub. Lent.az-ın ARDNŞ-in rəsmi saytına istinadən verdiyi məlumata görə, “Hess” Korporasiyasının icraçı vitse-prezidenti, eyni zamanda şirkətin kəşfiyyat və hasilat bölməsinin prezidenti Qreq Hill Azərbaycan və SOCAR ilə uzun müddət səmərəli əməkdaşlıq şəraitində çalışdıqlarını və bundan məmnun qaldıqlarını söyləyib.
O, Azərbaycanın sürətlə inkişaf etdiyini vurğulayıb və respublikamızda çalışdıqları müddətdə bu inkişaf prosesinə öz töhfələrini verməkdən şad olduqlarını, ötən dövrdə SOCAR-ın göstərdiyi dəstəyə görə ARDNŞ prezidentinə təşəkkürünü bildirib. Hindistanın Milli Neft Şirkətinin idarəedici direktoru D.K.Sarraf yaxın müddətdə ARDNŞ ilə əməkdaşlığa başlayacaqlarına və bu tərəfdaşlığın hər iki ölkə üçün məhsuldar olacağına əminliyini ifadə edib. Azərbaycanda xarici sərmayədarların fəaliyyəti üçün əlverişli imkanlar yaradıldığını vurğulayan qonaq yaxın zamanlarda Bakıda öz ofislərini açacaqlarını, SOCAR ilə birgə fəaliyyətin iki xalqın rifahına xidmət edəcəyini söyləyib.

ARDNŞ prezidenti Rövnəq Abdullayev uzunmüddətli əməkdaşlığa görə ABŞ-ın “Hess” şirkətinə təşəkkürünü bildirib, hər iki şirkətə gələcək fəaliyyətlərində uğurlar arzulayıb.