Elnur Məmmədlidən etiraz

Beynəlxalq Cüdo Federasiyasının (İJF) qaydalarda etdiyi dəyişiklik narazılıqla qarşılanıb.

Bu haqda Lent.az-a cüdo üzrə olimpiya çempionu Elnur Məmmədli məlumat verib. İJF cüdo yarışı zamanı idmançılardan birinin digərin ayağından tutaraq, fənd tətbiq etməsinə qadağa qoyub. 2008-ci il Pekin Yay Olimpiya Oyunlarının qalibi olan Məmmədli isə bildirib ki, bu qərar aparıcı cüdoçuların etirazına səbəb olub: “Dünyanın aparıcı cudoçuları ayağa qalxıb. Etiraz yazmışıq. Bu qərar xüsusən, ayağa fənd tətbiq etməyi daha yaxşı bacaran Qafqaz idmançılarına ciddi zərbə vuracaq. Bu, 18 il öncə Azərbaycanın kiril əlifbasından latın qrafikasına keçməsinə bənzəyir. Həmin vaxt da çoxları yazıb-oxumaqla bağlı problemlə üzləşmişdilər”.

Elnur Məmmədli Pekin olimpiadasında 73 kq çəki dərəcəsində qızıl medal qazanıb. Cüdoçumuz görüşlərinin hamısını təmiz qələbə ilə başa vurub. O, əli ilə əksər rəqiblərinin ayağına fənd tətbiq edərək, ipponla qalib gəlib. Məmmədlinin fikrincə, yeni qaydalara uyğunlaşmaq üçün ona bir müddət vaxt lazım gələcək: “Müntəzəm olaraq, bir neçə təlim-məşq toplantısında iştirak etməliyəm ki, yeni qaydalara uyğunlaşım. Bu yaxınlarda Fransanın paytaxtı Parisdə keçirilən “Böyük dəbilqə” turnirində digər cüdoçularımız da məhz bu səbəbdən, medalsız qaldılar. Hətta mənə zarafatla deyirlər ki, qaydaları sənə görə dəyişdiriblər”.

Elşən