Zaqatala sakini göbələkdən zəhərlənib. Zaqatala Rayon Mərkəzi Xəstəxanasından (RMX) APA-nın Şəki-Zaqatala bürosuna verilən məlumata görə, rayonun Yuxarı Tala kənd sakini, 1961-ci il təvəllüdlü Tahirə Əziz qızı Əhmədova oktyabr ayının 13-ü güclü zəhərlənmə diaqnozu ilə xəstəxanaya daxil olub.
Həkim müayinəsindən sonra məlum olub ki, 53 yaşlı qadın göbələkdən zəhərlənib. Tahirə Əhmədovanın vəziyyəti ağır olduğundan ona xəstəxanada lazımi ilkin tibbi yardım göstərildikdən sonra müalicəsini davam etdirmək üçün Respublika Toksikoloji Mərkəzinə göndərilib.
Qeyd edək ki, Zaqatalada göbələkdən zəhərlənmə son 4 gün ərzində ikinci hadisədi. Oktyabr ayının 11-i rayonun Suvagil kənd sakini, 1991-ci il təvəllüdlü Brilyant Rəsul qızı Məlikova da göbələk zəhərlənməsi ilə Zaqatala RMX-na daxil olub və elə həmin gün müalicəsini davam etdirmək üçün Respublika Toksikoloji Mərkəzinə göndərilmişdi.