Sevinc Vaqifqızı ilə "Ana xəbər" bloku – 5 May

GÜNÜN ŞƏRHİ

Yəməndə münaqişənin taleyi ABŞ-İran-Səudiyyə Ərəbistanı üçbucağında həll olunur. Nüvə proqramına dair prinsipial razılaşmadan sonra İranın regional güc kimi meydana çıxması Yaxın Şərqdə qüvvələr balansını dəyişir, həm də Səudiyyə Ərəbistanının əleyhinə dəyişir. İraq və Misirin meydanı tərk etməsindən sonra ərəb dünyasında lider boşluğu yaranıb. Bu boşluğu doldurmaq istəyən Səudiyyə Ərəbistanı ilk növbədə İranın Yaxın Şərqdə mövqelərini zəiflətməlidir. Ər-Riyadın zamanında ABŞ-ın Suriya və İraqa qarşı planlarını dəstəkləməsinin səbəbi də bu idi. Vaşinqtonun Suriya və İraq planlarının faktiki iflasa uğraması məntiqi olaraq Səudiyyənin də maraqlarını zərbə altına qoydu. Üstəlik ABŞ-ın manevr edərək Səudiyyənin bir nömrəli rəqibi İrana nüvə məsələsində yaşıl işıq yandırması Ər-Riyadı çətin vəziyyətə salıb. Bu baxımdan Yəmən müharibəsinə Səudiyyənin gizli müttəfiqi ABŞ-dan və açıq rəqibi İrandan qisas almaq cəhdi kimi baxmaq lazımdır.