Ayaqqabısının dabanında narkotik keçirmək istədi

İrandan Azərbaycana piyada gələn yerli vətəndaşın ayaqqabısının dabanında narkotik vasitələr müəyyən edilib.

Gömrük Komitəsinin mətbuat xidmətindən Lent.az-a verilən məlumata görə, Biləsuvar Gömrük İdarəsinin “Qoşa Təpə” gömrük postunun əməkdaşları tərəfindən aparılan yoxlamalar zamanı həmin şəxsin ayaqqabısının sağ tayının tərliyinin daban hissəsinin altından - dabanın oyuqlarında gizlədilmiş cəmi 2 ədəd bükümdə, xalis çəkisi 0,238 qram olan narkotik vasitə - heroin və 3 ədəd həbdən ibarət metadon adlı dərman preparatı aşkar olunaraq götürülüb.

Xatırladaq ki, metadon adlı dərman preparatı “Azərbaycan Respublikasının ərazisində dövriyyəsi məhdudlaşdırılan narkotik vasitələr”in II Siyahısına daxildir və 3 ədəd həbdə metadonun təsiredici maddəsinin ümumi miqdarı 0,015 qram təşkil edir.

Faktla bağlı araşdırma aparılır.