Azərbaycanda 9 yaşlı oğlan faciəvi şəkildə öldü - YENİLƏNİB

3 gün əvvəl Şirvan kanalında batan uşağın meyiti tapılıb. Lent.az Fövqəladə Hallar Nazirliyinin saytına istinadən xəbər verir ki, 21 aprel 2016-ci il tarixində Böhran Vəziyyətlərində İdarəetmə Mərkəzinə Şirvan şəhərində Şirvan su kanalında (ən yaxınlıqdakı məntəqədən 6 km aralıda nəzarətsiz ərazidə) 1 nəfərin batması barədə məlumat daxil olub. Dərhal Fövqəladə Hallar Nazirliyinin Dövlət Sularda Xilasetmə Xidmətinin dalğıc-xilasediciləri hadisə yerinə cəlb olunmuş və vətəndaşın axtarışlarına başlanılıb. Bu gün 2007-ci il təvəllüdlü, Əhmədov Şükür Fəxrəddin oğlunun cəsədi batdığı yerdən 5 km aralıda tapılıb çıxarılaraq aidiyyəti üzrə təhvil verilib.

Əməliyyat saat 14:59-da başa çatıb.

*****

21 aprel

Şirvanda 9 yaşlı uşaq kanala düşərək boğulub.

APA-nın Mil-Muğan bürosunun məlumatına görə, aprelin 20-də axşam radələrində Şirvan sakini, 2007-ci il təvəllüdlü Əhmədov Şükür Fəxrəddin oğlu ərazidən keçən Baş Şirvan kollektoruna düşüb.

Hazırda uşağın meyitinin axtarışları Fövqəladə Hallar Nazirliyinin sularda xilasetmə qrupu tərəfindən axtarılır.

Ş. Əhmədov Şirvan şəhər 11 saylı orta məktəbin 2-cü sinfində oxuyurdu.

Faktla bağlı hüquq-mühafizə orqanları tərəfindən araşdırma aparılır.

10:06

Şirvanda bir nəfər kanalda batıb. Lent.az Fövqəladə Hallar Nazirliyinin saytına istinadən xəbər verir ki, Böhran Vəziyyətlərində İdarəetmə Mərkəzinə Şirvan şəhərində su kanalında 1 nəfərin batması barədə məlumat daxil olub.

Dərhal Fövqəladə Hallar Nazirliyinin Dövlət Sularda Xilasetmə Xidmətinin dalğıc-xilasediciləri hadisə yerinə cəlb olunub və vətəndaşın axtarışlarına başlanılıb. Əlavə məlumat veriləcək.