Cəlilabadda ağır yol qəzası: ölən və yaralananlar var

APA-nın cənub bürosunun məlumatına görə, hadisə ötən gün saat 20:00 radələrində Ələt-Astara magistralının 121-ci kilometrliyində - Cəlilabad rayonunun Alar kəndi ərazisində qeydə alınıb.

Tehran-Bakı marşrutu üzrə hərəkət edən İran İslam Respublikasının vətəndaşı Oruc Xodesenin idarə etdiyi “SKANİYA” markalı avtobus Biləsuvar rayon sakini, 24 yaşlı Elçin Şahbazovun idarə etdiyi “VAZ-2106” markalı avtomaşınla toqquşub. Nəticədə “VAZ-2106”-nın sürücüsü və sərnişini, 33 yaşlı Biləsuvar rayon sakini Elnur Kazımov hadisə yerindəcə keçinib. “VAZ-2106”-da olan digər sərnişinlər - 28 yaşlı Araz Axundov, 29 yaşlı Fariz Həsənov və 29 yaşlı Elgün Kazımov müxtəlif dərəcəli bədən xəsarətləri alaraq Biləsuvar Mərkəzi Rayon Xəstəxanasına yerləşdirilib.

Qeyd edək ki, avtobusda olan 11 sərnişinin heç biri xəsarət almayıb. Onların hamısı digər maşınlarla Bakıya yola salınıblar.

Hələlik qəzanın baş verməsi səbəbləri ilə bağlı hər hansı məlumat verilməsə də, hadisə şahidlərinin sözlərinə görə, Tehrandan gələn avtobusda xəstə sərnişinlər olub. Ona görə də sürücü avtobusu sürətlə idarə etməyib. “VAZ-2106” markalı avtomobil qəfildən avtobusun qarşısına çıxıb. Avtobusun sürücüsü maşını kənara çəkməyə çalışsa da, qəza qaçılmaz olub. Faktla bağlı cinayət işi başlanıb, araşdırma aparılır.