Azərbaycanda yol “terror”u davam edir: 10 ölü

Lent.az-ın verdiyi məlumata görə, baş vermiş 10-dan çox hadisə nəticəsində 10 nəfər ölüb, 20 nəfərdən çox insan isə xəsarət alıb. Füzuli, Goranboy və Ucar rayonlarında baş vermiş qəzaların hər birində 2 nəfər ölüb, daha bir neçə şəxs isə yaralanıb.

- Bakı şəhərinin Qaradağ rayonunun Qobustan qəsəbəsi ərazisində, müəyyən edilməmiş avtomaşınla Gəncə şəhər sakini Yalçın Atayevi vurulub. Nəticədə piyada hadisə yerində ölüb.

Lənkəran rayonunun Şiləvar kəndi ərazisində, kənd sakini Elvin Quliyev "VAZ 2107" markalı avtomaşını idarə edərkən yolun hərəkət hissəsində velosiped sürən həmkəndlisi Elcan Məmmədovu vurub. Nəticədə xəsarət almış E.Məmmədov xəstəxanaya aparılarkən yolda ölüb.

- Şamaxı rayonunun Dədəgünəş kəndi ərazisində, şəhər sakini Əlikram Əsədov "VAZ 2107" markalı avtomaşını idarə edərkən onu aşırıb. Nəticədə Ə.Əsədovun sərnişinlərindən Sürəyya İmanova hadisə yerində ölüb, xəsarət almış özü və digər sərnişinləri xəstəxanaya yerləşdirilib, vəziyyətləri orta-ağırdır.

- Avqustun 27-də saat 20.30 radələrində Hacıqabul rayonu ərazisində, Şirvan şəhər sakinləri Elmar Babayev "VAZ-21015" markalı avtomaşını idarə edərkən onu yol ayrıcındakı dəmir səddə, sonradan isə eyni istiqamətdə hərəkətdə olan Şirvan şəhər sakini Rəşad Cəbiyevin idarə etdiyi "VAZ-2107" markalı avtomaşına vurub. Nəticədə E.Babayevin avtomaşını aşıb və sərnişini, 3 aylıq körpə Həvva Mustafazadə aldığı xəsarətdən hadisə yerində ölüb.

Bundan başqa avqustun 25-də saat 07.30 radələrində Tovuz rayonunun Qovlar şəhəri ərazisində, qəsəbə sakini Rövşən Həsənovun idarə etdiyi "VAZ-2103" və rayon sakini Anar Tağıyevin idarə etdiyi "VAZ-2104" markalı avtomaşınlar toqquşması nəticəsində xəsarət almış A.Tağıyev xəstəxanada ölüb.