Soyuq mövsümdə evin isti olması qədər, istilik və elektrikdən düzgün istifadə etmək də vacibdir. Əksər hallarda yüksək kommunal xərclər gündəlik, zərərsiz görünən, lakin enerjinin boş yerə sərf olunmasına gətirən vərdişlərdən qaynaqlanır.
Lent.az xarici mediaya istinadla xəbər verir ki, məhz bu xırda səhvlər qışda hesabların artmasının əsas səbəblərindəndir.
Radiatoru günboyu maksimumda saxlamaq — ən geniş yayılmış səhv
Mütəxəssislərin sözlərinə görə, radiatorların tam gücdə fasiləsiz işləməsi otağı daha tez isitməyə kömək etmir, əksinə, havanı həddindən artıq qızdırır və enerjiyə ehtiyacdan çox sərfiyyat yaradır. Daha effektiv yanaşma sabit temperaturu qorumaq və gücü yalnız evdə insanlar olduqda artırmaqdır.
Radiatorun qarşısını bağlamaq istilik itkisinə səbəb olur
Mebel, qalın pərdələr və ya qurudulan paltarların radiatorun qarşısını kəsdiyi hallarda istilik otağa yayıla bilmir və istilik sistemi daha uzun müddət işləməyə məcbur olur. Bu isə xərclərin artması deməkdir.
Kotlunun texniki vəziyyəti mühüm rol oynayır
Filtrlərin çirkli olması, sistemdə hava qalması və ya təzyiqin aşağı olması istilik səmərəliliyini əhəmiyyətli dərəcədə azaldır. Bu səbəbdən mütəxəssislər kotlunun müntəzəm texniki baxımını vacib sayırlar, bu, artıq xərclərin qarşısını almağa kömək edir.
İstifadə olunmayan otaqları isitməyə dəyməz
Az istifadə olunan və ya tamamilə boş olan otaqların daim isidilməsi də enerji itkisinə səbəb olur. Mütəxəssislər belə məkanlarda qapını bağlı saxlamağı və istiliyi minimuma endirməyi məsləhət görürlər.
İstilik itkisinə ən çox təsir edən amil — izolyasiya
Sızdıran pəncərələr və qapılar evdən istiliyi çox sürətlə buraxır. Sadə izolyasiya lentləri, V-formalı contalar və ya termo pərdələr belə vəziyyəti xeyli yaxşılaşdırır və istiliyi içəridə saxlayır.
Təbii istilikdən düzgün istifadə etmək də vacibdir
Gün ərzində pərdələri açıb günəş işığının içəri düşməsinə icazə vermək məkanı təbii şəkildə isidir. Axşam isə qalın pərdələr soyuğa qarşı əlavə baryer yaradır və istiliyi qoruyur.
Mütəxəssislər bildirirlər ki, gündəlik vərdişlərdə ediləcək kiçik dəyişikliklər hesab-fakturalarda hiss olunan qənaət yarada bilər. Bu addımlar cəmi bir neçə saniyə vaxt aparsa da, qış boyunca xərcləri ciddi şəkildə azaldır.
Xatırladaq ki, soyuq mövsümün başlaması ilə birlikdə mütəxəssislər pəncərələr və qapılardakı boşluqları bağlamağı tövsiyə edirlər. Sadə üsullar özünü yapışdıran lent, V-formalı contalar və ya silikon hermetik istilik itkisini 5–30% azaltmağa kömək edir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
