Bəzən dəsmallar yumşaqlığını itirir, küf kimi qoxur və ya əvvəlkindən daha gec quruyur. Mütəxəssislərin sözlərinə görə, buna çox vaxt parçanın özü deyil, yanlış qulluq səbəb olur. Sadə bir mətbəx vasitəsi, adi ağ sirkə isə vəziyyəti tam dəyişə bilər.
Lent.az xəbər verir ki, əsas məsələ onu necə və nə vaxt istifadə etməyi bilməkdir ki, həm dəsmallara yumşaqlıq və təzəlik qaytarsın, həm də paltaryuyan maşına ziyan vurmasın. Mütəxəssislər izah edir ki, dəsmallar sərtləşəndə və ya qapalı, nəm qoxusu yayanda onları sirkə ilə yumaq lazımdır. Belə hallarda sirkə parçanın üzərində yığılan yuyucu vasitə qalıqlarını və mineral çöküntüləri həll edir. Bu çöküntülər parçanı sərt və xoşagəlməz edir.
Lakin düzgün yuma yalnız qulluq prosesinin bir hissəsidir. Dəsmalları sərin və yaxşı havalanan yerdə saxlamaq vacibdir. İsti və rütubətli mühit parçanın daha uzun müddət nəm qalmasına səbəb olur və bunun nəticəsində bakteriya və kif sürətlə çoxalır. Nəm dəsmalları paltaryuyan maşında və ya çirkli paltar səbətində saxlamaq olmaz. Hava keçirməyən qapalı mühit nəmin toplanması üçün ideal şərait yaradır. Buna görə də istifadə etdikdən sonra dəsmalları ya dərhal asmaq, ya da tam qurudaraq dolaba yerləşdirmək lazımdır.
Mütəxəssislər həmçinin paltaryuyan maşının həddindən artıq doldurulmasının zərərlərini qeyd edir. Əgər baraban çox dolu olarsa, dəsmallar lazımi qədər yuyulmur və yaxalanmır. Parçanın arasında yuyucu qalıqları və xoşagəlməz qoxu qalır, nəticədə yuyulmanın effekti gözlənilən kimi olmur.
Bir məqama xüsusi diqqət yetirilməlidir. Sirkə və yuyucu vasitəni eyni anda istifadə etmək olmaz. Sirkə turşu, yuyucu vasitə isə qələvidir. Birlikdə istifadə olunanda onlar bir-birini neytrallaşdırır və faydası itir. Ona görə sirkəli dövr və yuyucu vasitə ilə yuma prosesi ayrı aparılmalıdır. Bəzi insanlar sirkədən sonra dəsmalların xüsusi bir qoxu ala biləcəyindən narahat olur. Lakin sirkəni normada istifadə etsəniz və paltaryuyan maşın yaxşı yaxalasa, kəskin qoxu qalmır. Əgər qoxu hiss olunarsa, əlavə bir yuma dövrü və az miqdarda yuyucu vasitə və ya yarım stəkan soda kömək edir. Dəsmalların xoş ətirli olması üçün yuma prosesindən əvvəl bir neçə damcı efir yağı əlavə etmək olar. O, zərif qoxu buraxır və bəzi efir yağlarının antimikrob xüsusiyyətləri kifin yayılmasının qarşısını alır.
Maşınla yuyulan əksər parça növləri sirkə ilə müalicəni yaxşı qəbul edir. Əsas odur ki, yalnız ağ distillə olunmuş sirkədən istifadə edilsin. Alma sirkəsi parçanı ləkələyə bilər və sarımtıl çalar qoyar.
Təsərrüfat üçün nəzərdə tutulmuş sirkə isə paltaryuyan maşının daxili hissələrinə ziyan vura bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
