Yarım əsr qardaşının adı ilə yaşayan 86 yaşlı kişi HAKİM QARŞISINDA

86 yaşlı amerikalı qardaşının şəxsiyyətini oğurlamaqda təqsirli bilinib.

Lent.az xarici mediaya istinadən bildirir ki, həmin şəxs sosial sığorta nömrəsindən istifadə edərək pul qazanmağa çalışıb.

Men ştatının Etna şəhərindən olan Napoleon Qonzales mərhum qardaşı Gilermonun şəxsiyyətini özünə götürüb. Gilermo 1939-cu ildə uşaq ikən ölüb və 1965-ci ildə Napoleon ilk dəfə onun adından istifadə edib. O, yarım əsr Gilermonun adı ilə yaşayıb. Bir neçə pasport, şəxsiyyət vəsiqəsi və əlavə ödənişlər aldığı əlavə sosial sığorta nömrəsini qeydiyyatdan keçirə bilib.

O, ilk dəfə 2010-cu ildə dələduzluqda şübhəli bilinib, bununla əlaqədar ödənişlərin bir hissəsi dayandırılıb. 2020-ci ildə elektron üz tanıma sistemi Qonzalesi iki fərqli şəxsiyyət vəsiqəsində tapdıqdan sonra yeni bir araşdırma başlanıb. Avqustun 18-də həmin şəxs bir neçə dələduzluq ittihamı ilə məhkəmə qarşısına çıxıb.

Dinləmə zamanı Qonzales məhkəməyə bildirib ki, o, 1960-cı illərdə gizli əməliyyatda iştirak etdiyi üçün Hərbi Hava Qüvvələri Xüsusi İstintaq Departamentinin göstərişi ilə qardaşının şəxsiyyətini öz üzərinə götürüb. O, həmçinin etiraf edib ki, sonradan öz ölümünü saxtalaşdırıb və qardaşının sənədləri ilə yaşamağa davam edib.

Qonzalesin günahı sübuta yetirilərsə, onu 20 ilə qədər həbs cəzası gözləyir. Vəkili Harris Mattsonun sözlərinə görə, prokuror bütün ittihamları sübut edə bilməyib və Qonzalesə yaşına görə həbs cəzası verilməməlidir.