Vatikanda 16-cı Benediktin papalıq vəzifəsini tərk etməsindən sonra Kardinallar Məclisində yeni rəhbərin seçimləri davam edir. Lent.az-ın “habertürk”ə istinadən verdiyi məlumata görə, bu gün kardinallar yeni papanı seçmək üçün ikinci dəfə bir araya gəlib. 48 ölkədən 115 kardinalın iştirak etdiyi və Sistin Sapelidə keçirilən görüşdə ikinci dəfə razılaşma əldə edilməyib. Beləliklə də səbirsizliklə 266-cı papanın seçilməsini gözləyən 1,2 milyardlıq dünya katolikləri üçün növbəti dəfə bacadan qara tüstü buraxılıb.
Vatikanın Müqəddəs Petrus meydanında toplaşmış minlərlə insan növbəti görüşü gözləməli olacaq.
Yeni papanın seçim dönəmini Romaya gəlmiş yüzlərlə jurnalist də izləyir.