Məhkumlar Saakaşvilini coşqu ilə qarşıladılar - VİDEO

Gürcüstanın keçmiş prezidenti Mixail Saakaşvili Tbilisinin Qldani rayonundakı həbsxana xəstəxanasına aparılıb.

Lent.az-ın xarici mediaya istinadla məlumatına görə, onu ora gətirəndə böyük bir hay-küy yaranıb. Məhkumlar qışqıraraq kameralardan əllərində dəsmal yelləyiblər.
Gürcüstan Ombudsman Aparatının nümayəndəsinin sözlərinə görə, Saakaşvili təcrid olunmuş palataya yerləşdirilib, onun palatasının perimetri ətrafında başqa məhbus yoxdur.

Bundan əlavə, Qldani həbsxanasına köçürülməsinə etiraz olaraq Saakaşvili gətirildiyi avtomobili tərk etməkdən imtina edib. Ona görə də əlləri ilə güc tətbiq etməklə onu maşından çıxarıb kameraya göndəriblər.

Qeyd edək ki, Gürcüstanın eks-prezidenti hələ də müalicədən imtina edir və aclıq aksiyasını davam etdirir.

Həkimlər şurası siyasətçinin təcili olaraq multitexnoloji avadanlıqla təchiz edilmiş xəstəxanaya köçürülməsinin zəruriliyi barədə təcili bəyanat verib. Nəticədə oktyabrın 8-də Saakaşvili helikopterlə 12 saylı islah koloniyasından çıxarılıb.