Krım körpüsünün partlayışında erməni izi... - Günahkarlar açıqlandı

Şənbə günü Ukraynaya raketlər yağdıraraq vurulan Krım körpüsünün qisasını alan Rusiya hücumun arxasındakı adı açıqlayıb.

Lent.az xəbər verir ki, Rusiya Federal Təhlükəsizlik Xidmətinin (FTX) İctimaiyyətlə Əlaqələr Mərkəzi bununla bağlı məlumat yayıb.

“Federal Təhlükəsizlik Xidməti və İstintaq Komitəsi tərəfindən müəyyən edilib ki, Krım körpüsündə partlayışın təşkilatçıları Ukrayna Müdafiə Nazirliyinin Baş Kəşfiyyat İdarəsi, onun rəhbəri Kirill Budanov, idarənin əməkdaşları və agentləridir” – deyə məlumatda qeyd olunub.

Federal Təhlükəsizlik Xidməti tərəfindən hücumun hazırlanmasında iştirak edən 8 nəfər saxlanılıb. Hazırda cinayətin hazırlanmasında iştirak edən beş Rusiya, üç Ukrayna və Ermənistan vətəndaşı cinayət işi çərçivəsində saxlanılıb.

Ümumilikdə hazırda terror aktının təşkilində əli olan ən azı 12 nəfər müəyyən edilib.

“Partlayıcı maddənin Bolqarıstandan Gürcüstanın Poti limanına, oradan da Ermənistana ötürülməsinin təşkili işinə Ukrayna vətəndaşları olan 1975-ci il təvəllüdlü Syurkalo Mixail Vladimiroviç, 1979-cu il təvəllüdlü Kovaç Denis Oleqoviç, 1971-ci il təvəllüdlü Solomko Roman İvanoviç, Gürcüstan vətəndaşları olan İnosaridze Sandro, Levan adlı broker və Ermənistan vətəndaşı olan 1985-ci il təvəllüdlü Artur Terçanyan cəlb edilib. Ukrayna vətəndaşı olan 1987-ci il təvəllüdlü Volodimir Vasilyeviç Zlob və daha 5 nəfər Rusiya vətəndaşının köməkliyi ilə yükü qəbul edən Krımda mövcud olmayan şirkət kimi göstərilib.” – deyə FTX-nin məlumatında bildirilib.

Lətif İsmayılov