“Onunla yatmırdıq...”

Liviya prezidenti Müəmmər Qəddafinin beş ukraynalı tibb bacısından biri olan Oksana Balinskaya CNN telekanalına müsahibə verib. Lent.az-ın CNN-ə istinadən verdiyi məlumata görə, 25 yaşlı Oksana Balinskaya Liviya liderinin hərəmi olduqları yönündə iddiaları yersiz adlandırıb.

O deyib ki, evin içərisində Müəmmər Qəddafi ilə tək qala biləcəkləri otaq belə olmayıb: “Ağlı olan bizim Müəmmər Qəddafi ilə cinsi əlaqədə olduğumuza necə inanar? Onunla yatmırdıq. Evin içində çox abırlı geyinirdik, dodaqlarımıza boya belə çəkməzdik. Müəmmər Qəddafi mənimlə və digər tibb bacıları ilə ata kimi davranıb. Mən 2 il ərzində onun təzyiqini ölçüb, vitamin vermişəm. Müəmmər Qəddafi bizə iş, pul və gözəl həyat verdi”.

Müəmmər Qəddafinin öldürülməsi, yaxud tutulması kimi xəbərlərin onu çox pis edəcəyini bildirən Oksana Balinskaya qeyd edib ki, Liviya lideri tibb bacılarına qarşı çox həssas olub: “Həmişə xoşbəxt olub-olmadığımızı, bir şeyə ehtiyacımız olub-olmadığımızı soruşub. Hər il hakimiyyətə gəldiyi sentyabr ayında Müəmmər Qəddafi yaxın ətrafın, o cümlədən bizə hədiyyə verirdi. Mənə də bir medalyon və üzərində Müəmmər Qəddafinin rəsmi olan saat hədiyyə edilib. Onu da deyim ki, Liviyada həyat səviyyəsinin yüksəlməsi Müəmmər Qəddafinin əməyi ilə bağlıdır. Müəmmər Qəddafi liviyalıları dəvənin sırtından endirib avtomobillərə mindirdi”.