Ərdoğanın deputatı: “Məni ərimdən qoruyun...”

Lent.az-ın “Hürriyet” qəzetinə istinadən verdiyi məlumata görə, Ağrı vilayətindən deputat seçilən Fatma Salman Kotan və həyat yoldaşı İdris Kotan boşanmaq üçün Sincan Ailə Məhkəməsinə üz tutublar. Fatma Salman Kotan məhkəməyə növbəti müraciətində isə qorunması üçün dövlət tərəfindən mühafizəçi ayrılmasını istəyib. Məhkəmə İdris Kotana 6 ay Fatma Salman Kotana yaxınlaşmaması və narahat etməməsi ilə bağlı qərar verib. İdris Kotan məhkəmənin bu qərarını pozarsa, həbs ediləcək.

Mətbuatda əri tərəfindən döyülməsi barədə yayılan xəbərləri təkzib etməyə çalışan Fatma Salman Kotan məhkəmədən nə üçün mühafizəçi istəməsi barədə “Hürriyet”-in sualını isə cavablandırmaqdan imtina edib: “Səbəbini sizə niyə söyləyim? O, mənim özəl məsələmdir...”
Qeyd edək ki, 3 övladı olan Fatma Salman Kotan bundan öncəki dönəmdə də AKP-nin siyahısı üzrə millət vəkili seçilib. Fatma Salman Kotan parlamentdəki çıxışlarının birində anasını atasının oğlan uşağı dünyaya gətirməsi istəyi ucbatından 20 yaşında doğuş zamanı həyatını itirdiyini söyləyib və onun müraciəti əsasında parlamentdə erkən yaşda evliliklərin araşdırılması üçün alt komissiya yaradılıb. Fatma Salman Kotan özü də bu komissiyanın sədri seçilib.