Avropa İsrailə qəzəblənib

İsrail tarixində ən ciddi diplomatik böhranla üzləşə bilər. Lent.az-ın “Haarets” qəzetinə istinadən verdiyi məlumata görə, İsrail baş naziri Benyamin Netenyahunun keçən həftə Qüds və Maale Adum arasındakı E-1 zonasında tikintiyə başlanılması barədə qərar verməsi Avropa dövlətlərini qəzəbləndirib.

İsrail hökumətinin bu ərazidə 3 min yeni tiklinin inşası barədə qərarından sonra Böyük Britaniya və Fransanın səfirləri İsrail Xarici İşlər Nazirliyinin baş direktoru Rafi Baraka zəng ediblər. Səfirlər bildiriblər ki, dövlətləri İsrailin bu qərarına ən sərt formada etiraz bildirməyə hazırlaşırlar, ən radikal addım ata bilərlər.

Hollandiya səfiri, Avropa Birliyinin və Almaniya səfirinin müavini də İsrail Xaric İşlər Nazirliyinə etirazlarını çatdırıblar. Böyük Britaniya və Fransa xüsusilə İsrailə qəzəblənib. Rəsmi Londonla Paris hesab edir ki, Benyamin Netenyahu hökuməti İsrailin Qəzza zolağında keçirdiyi “Tökmə Qurğuşun” əməliyyatı zamanı Avropa dövlətlərinin verdiyi dəstəyi qiymətləndirməyib və onların etimadından sui-istifadə edilib. E-1 zonasında tikintini qırmızı xəttin keçilməsi kimi dəyərləndirən Böyük Britaniya və Fransa hazırda Təl-Əvivdəki səfirlərini geri çağırmaq məsələsini müzakirə edirlər. Əgər bu iki dövlət səfirlərini geri çağırarlarsa, bu, İsrailin tarixində ən ciddi diplomatik böhran olacaq. London və Parisin səfirlərin geri çağırılması barədə qərarını bu gün qəbul edəcəkləri gözlənilir. Böyük Britaniya və Fransa ABŞ və Almaniyanın da İsrailə sərt reaksiya verməsinə nail olmağa çalışırlar. Dekabrın 7-də Benyamin Netenyahunun Berlinə rəsmi səfəri nəzərdə tutulub.

“Haarets” Avropadakı mənbələrə istinadən yazır ki, İsrailə qarşı başqa sanksiyalar da tətbiq edilə bilər. Bunların arasında İsrail-Avropa Birliyi seminarlarının ləğvi, İsrail istehsalı olan məhsulların alınmasına qadağa qoyulması da var.