Alma-Atıdakı universitet Hüsnü Mübarəkin adından «məhrum edilib»

Alma-Atıdakı «Nur-Mübarək» adına Misir İslam Mədəniyyəti Universitetinin adı dəyişdirilib.

Lent.az-ın Tengrinews-a istinadən məlumatına görə, universitetin adından Misirin keçmiş prezidenti Hüsnü Mübarəkin adı götürülüb. Bundan sonra bu təhsil müəssisə «Nur» adına Qazaxıstan-Misir İslam Universiteti adlanacaq.

Qazaxıstan Müsəlmanlar Birliyi və Orta Asiyada insan haqları üzrə Müsəlman komitəsi universitetin adının dəyişdirilməsi tələbi ilə çıxış edib. «Müsəlman təşkilatları hesab edir ki, Qazaxıstandakı təhsil müəssisəsinin belə bir müəmmalı siyasətçinin adı adlanması yolverilməzdir» -deyə, təşəbbüskarlar bildirib.

İslam Mədəniyyəti Universiteti 2000 –ci ildə iki ölkə arasında uyğun razılaşmaya əsasən təsis olunub. Orada ərəbşünas, ilahiyyatçı və imamlar hazırlanır. 2004 - 2011-ci illər ərzində bu universiteti 262 nəfər bitirib və hazırda onlar Qazaхıstanın məscidlərində imam, imam naibləri vəzifəsində çalışırlar.