211
12:06
07 İyun 2019

Dmitri Peskov: “Bakı Moskvanın çox vacib tərəfdaşıdır”

“Rusiya-Azərbaycan münasibətləri qədim tarixə, tərəfdaşlıq və dostluq ənənələrinə malikdir. Bu gün bu münasibətlər çox sıxdır”.
Bunu APA -nın Sankt-Peterburqa ezam olunmuş xüsusi müxbirinə açıqlamasında Rusiya prezidentinin mətbuat katibi Dmitri Peskov bildirib.
Onun sözlərinə görə, Azərbaycan Rusiyanın Cənubi Qafqazda əsas tərəfdaşlarından biridir: “Rusiya ilə Azərbaycanı bir çox ümumi maraqlar birləşdirir. Bizi ilk növbədə xalqlarımız arasında olan mədəni əlaqələr birləşdirir”.
Kremlin sözçüsü Rusiya ilə Azərbaycan arasında iqtisadi münasibətlərin də uğurla inkişaf etdiyi söyləyib: “İki ölkə arasında iqtisadi əməkdaşlıq mövcuddur. Xəzər dənizi hövzəsində də əməkdaşlıq edirik. Ən əsası, regionun sabitliyi və təhlükəsizliyi məsələlərində əməkdaşlıq edirik. Bütün bu sadaladıqlarım Rusiya ilə Azərbaycanı birləşdirən ümumi maraqlarıdır. Bakı Moskvanın çox vacib həmsöhbəti və tərəfdaşıdır”.
Yaxın vaxtlarda Rusiyanın təşəbbüsü ilə Dağlıq Qarabağ münaqişəsinin nizamlanması ilə bağlı yüksək səviyyəli görüşün keçirilməsinin mümkünlüyü və dünən Peterburq forumu çərçivəsində prezident Vladimir Putinin Ermənistan baş naziri ilə görüşündə münaqişənin həlli ilə bağlı hansısa konkret məsələnin müzakirə olunub-olunmaması barədə suala cavabında D.Peskov bu günlərdə bu mövzunun müzakirə olunmadığını bildirib.