Bakcell “Hackathon Azerbaijan”la əməkdaşlığa başladı

Azərbaycanın İlk Mobil Operatoru və Aparıcı Mobil İnternet Provayderi Bakcell şirkəti, “Hackathon Azerbaijan” layihəsi ilə əməkdaşlığa başladığını məmnuniyyətlə elan edir. Bakcell, layihə çərçivəsində keçirilən və 21 yanvar – 10 mart, 2013-cü il tarixlərini əhatə edən “Win Phone 2" müsabiqəsinin baş sponsorudur.

Bakcell bununla Azərbaycanda gənc proqram tərtibatçılarının inkişafına dəstək göstərmək niyyətindədir. Müsabiqəyə təqdim olunacaq mobil tətbiqetmələr “Windows 8” platformasında hazırlanmalıdır.

Müsabiqədə iştirak etmək üçün 21-31 yanvar tarixləri arasında www.hackathonazerbaijan.org saytında qeydiyyatdan keçmək kifayətdir. Qeydiyyatdan keçən şəxslərin iştirakı müvafiq seçim əsasında müəyyənləşəcək.

Fevralın 3-də isə müsabiqədə iştirak hüququ qazananlar üçün ilk təlim təşkil ediləcək. Qaliblər qiymətli hədiyyələrlə təltif olunacaq.

“Bakcell”in baş sponsorluğu, “Microsoft Azerbaijan”, “Nokia” və “Mobitel”-in sponsorluğu ilə keçirilən müsabiqənin təşkilatçısı “İlk Addımlar” elektron tədris layihəsidir.

Qeyd edək ki, bu, “Bakcell”in baş sponsoru olduğu ikinci belə layihədir. Şirkət eyni zamanda mobil tətbiqetmələrin inkişafına yönələn daha bir layihəni – “Mobile Monday” layihəsinin tərəfdaşıdır.

“Hackathon” haker neologiyası, yəni proqramçıların birləşərək müxtəlif problemləri həll etdikləri, layihələr hazırladıqları və yarışdıqları tədbirlər silsiləsidir. Onun əsas mahiyyəti keçirildiyi müddət ərzində müxtəlif proqramların və alətlərin yaradılması, bununla da proqramçı və hakerlərin öz aralarında rəqabət şəraitində biliklərini yoxlamaq və yeni biliklər qazanmaqdır.

***

Bakcell haqqında

Azərbaycanın İlk Mobil Operatoru və Aparıcı Mobil İnternet Provayderi Bakcell şirkəti müasir mobil kommunikasiya xidmətləri istifadəçilərinə geniş çeşiddə məhsullar təklif edir. Bakcell, Sür@ ticarət nişanı adı altında öz abunəçilərinə ən mükəmməl 3G mobil internet xidməti göstərir.

Ölkənin qeyri-neft sektorunun ən iri investorlarından biri olan Bakcell, ən son texnologiyalar və abunəçilərinə xidmət edən insan resursları vasitəsilə Azərbaycan iqtisadiyyatına böyük həcmdə sərmayə yatırmaqda davam edir.

Bakcell-in şəbəkəsi ölkə əhalisinin 99%, ölkə ərazisinin 92%-ni (işğal olunmuş ərazilər istisna olmaqla) əhatə edir. İnnovasiyalar sahəsində lider olan şirkət, Sür@ xidməti və yeni tərfədaşlıqları vasitəsilə Azərbaycan əhalisini ən yüksək səviyyəli mobil internet xidmətləri ilə təmin edir. 257 pərakəndə satış nöqtəsi və həftənin 7 günü, günün 24 saatı fəaliyyət göstərən 7 Müştəri Xidmətləri Mərkəzində istifadəçilərə ən üstün müştəri təcrübəsi təklif olunur.

Bakcell və onun məhsul və xidmətləri haqqında ətraflı məlumat əldə etmək üçün, xahiş edirik, www.bakcell.com internet səhifəsinə daxil olun və ya 555-ə zəng edin. Press-relizlərlə tanış olmaq üçün www.bakcell.com/az/news (və ya İngilis dili üçün www.bakcell.com/en/news) səhifəsinə daxil olun.

Qeyri-Bakcell abunəçiləri isə 055 0000 555 nömrəsinə zəng etməklə Bakcell-in xidmətləri haqqında məlumat əldə edə bilərlər.