Qadcetlər uşaqların inkişafına ciddi təsir göstərir – Alimlər

Qadcetlərin uşaqların beyninə nə qədər təsir etdiyi məlum olub.

Lent.az xarici mediaya istinadən xəbər verir ki, 33 neyrogörüntüləmə tədqiqatının təhlilini əhatə edən araşdırma rəqəmsal texnologiyanın 6 aydan 12 yaşa qədər olan uşaqların beyninə təsiri haqqında geniş məlumat verib.

Rəqəmsal cihazların təsirinin həm müsbət, həm də mənfi tərəflərini ortaya qoyan bu genişmiqyaslı təhlilə 30 000-dən çox iştirakçı cəlb edilib.

Əsas tapıntılardan biri ekran vaxtının uşaqların beyninin müxtəlif sahələrinə uzunmüddətli təsir göstərməsidir. Dəyişikliklər əsasən icraedici funksiyalara cavabdeh olan prefrontal korteksdə, sensor məlumatlara cavabdeh olan parietal lobda və vizual məlumatın şərhinə cavabdeh olan temporal lobda qeyd edilib.

Nəticədə diqqət və idrak bacarıqlarının yaxşılaşdırılması kimi müsbət təsirlər müəyyən edilsə də, mənfi dəyişikliklər üstünlük təşkil edib. Rəqəmsal qadcetlərdən aktiv istifadə edən uşaqlarda diqqət, icra nəzarəti və digər idrak proseslərindəki pozulmalar daha çox nəzərə çarpır.

İnternetin və video oyunların təsirinə xüsusi diqqət yetirilir. Bu da tədqiqatda qeyd olunduğu kimi beynin nahiyələrində mənfi dəyişikliklərə səbəb ola bilər və intellektual fəaliyyətə təsir edə bilər.

Bununla belə, rəqəmsal cihazlar yalnız zərərli hesab edilməməlidir. 33 tədqiqatdan altısı qadcetlərdən istifadənin yaxşılaşmış diqqət və icra funksiyası kimi müsbət təsirləri aşkar edib.