2025-ci ildə İİ-köməkçilər, qatlanan form-faktorlar və güclü funksionallığa malik münasib qiymətli modellər Android bazarında əsas trendlərə çevrildi.
Lent.az xarici mediaya istinadən xəbər verir ki, mütəxəssislər 2025-ci ildə İİ-kompanyonlar, qatlanan form-faktorlar və güclü imkanlara malik büdcə modelləri Android cihazları bazarında əsas trendlərdən olduğunu qeyd ediblər.
Google Pixel 9a – ən yaxşı büdcə Android
Google Pixel 9a sübut etdi ki, premium İİ imkanları artıq məhdud büdcə ilə də əlçatan olur. Bu, Google-un flaqman olmayan modelləri arasında Gemini Nano adlı daxili İİ-assistentin yerləşdirildiyi ilk cihazdır. Bu assistent Circle to Search və fotoların İİ ilə yaxşılaşdırılması kimi funksiyaları təmin edir.
İkili kamera (48 MP + 13 MP) qiymətinə görə kifayət qədər yaxşı çəkiliş keyfiyyəti təqdim edir, böyük batareya davamlılığı və möhkəm korpus isə Pixel 9a-nı gündəlik istifadə üçün əla seçim edir. Ümumi performans baxımından keçən ilin flaqmanlarına çox yaxın olması orta sinif cihaz üçün kifayət qədər təsiredicidir.
Samsung Galaxy Z Flip 7 – ən yaxşı qatlanan “flip” model
Galaxy Z Flip 7 dəbli qatlanan smartfon istəyən, amma çox böyük ekrana ehtiyac duymayanlar üçün ideal seçimdir. Telefon üfüqi şəkildə qatlanır və xarici FlexWindow displeyində (4,1") cihazı açmadan bir çox funksiyadan istifadə etmək mümkündür.
“Bu, qatlanan cihazlarla maraqlanan, amma Samsung Fold kimi premium modellərə artıq pul ödəmək istəməyənlər üçün optimal seçimdir,” – ekspertlər yazır.
Samsung Galaxy Z Fold 7 – ən yaxşı qatlanan smartfon
Samsung Galaxy Z Fold 7 bazardakı ən maraqlı qatlanan cihazlardan biri hesab olunur. Flip-dən fərqli olaraq, kitab kimi açılıb-bağlanır və faktiki olaraq həm smartfon, həm də planşet funksiyasını bir arada təqdim edir.
Çoxtapşırıqlılıq, sənədlərlə iş və oyunlar üçün çox uyğundur və üst səviyyə texniki göstəricilərə malikdir.
Xüsusi diqqət menteşənin möhkəmliyinə yönəldilib – Samsung davamlılığı artırıb və ekrandakı qat izini azaldıb. Bu məsələ əvvəlki qatlanan cihazlarda tez-tez tənqid olunurdu. Lakin yüksək qiymət və spesifik form-faktor onu hər kəs üçün uyğun etmir.
Google Pixel 10 Pro – kamera və İİ-yə fokuslanan flaqman
Google Pixel 10 Pro Pixel seriyasının ən yaxşı kamerafon yaratmaq ənənəsini davam etdirir. O, 50 MP əsas kamera, 48 MP ultra-geniş bucaqlı kamera və 100 dəfə rəqəmsal yaxınlaşdırma imkanı əldə edib. Bu funksiyalar müxtəlif ssenarilərdə çox yaxşı fotolar çəkməyə şərait yaradır.
İİ əsaslı funksiyalar şəkillərin işlənməsinə, kadrların düzəldilməsinə və ən yaxşı anların seçilməsinə kömək edir. Bundan əlavə, Google 7 ilə qədər Android yeniləməsi vəd edir ki, bu da Pixel 10 Pro-nu uzunmüddətli istifadə üçün sərfəli seçimə çevirir.
Samsung Galaxy S25 Ultra – ən yaxşı Android smartfon
2025-ci ilin yanvarında çıxmasına baxmayaraq, Samsung-un flaqmanı premium “dəmir”, yüksək səviyyəli kameralar və qabaqcıl İİ funksiyalarının birləşməsi sayəsində hələ də mütləq lider olaraq qalır. Model ProScaler texnologiyası ilə təchiz edilmiş xüsusi Snapdragon 8 Elite prosessoru üzərində işləyir və bu texnologiya görüntü keyfiyyətini 40%-ə qədər yaxşılaşdırır.
Galaxy S25 Ultra-nın kamerası da ən yüksək qiymətləri alıb – bir neçə sensorlu sistem zəif işıqda belə uğurlu nəticə verir, daxili İİ alətləri isə şəkilləri avtomatik yaxşılaşdırmağa kömək edir. Yüksək dəqiqlikli ekran və möhkəm yığılma keyfiyyəti premium təəssüratı tamamlayır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
