UNEC tələbələri nüfuzlu şirkətin təqaüdünü qazana biləcəklər

Noyabrın 5-də İqtisad Universiteti (UNEC) ilə “AzFinance Invest” şirkəti arasında əməkdaşlıq haqqında saziş imzalanıb.

UNEC-in mətbuat xidmətindən Lent.az-a verilən məlumata görə, saziş tələbələrin maliyyə-investisiya xidmətləri haqda praktiki biliklərinin artırılmasına, şirkətin adlı təqaüdünü əldə etmələrinə və real iş mühitində istehsalat təcrübəsini keçmələrinə şərait yaradacaq.

UNEC rektoru Ədalət Muradov qeyd edib ki, tədris prosesində nəzəri biliklərlə yanaşı, praktiki məlumatların çatdırılması vacibdir. Bu təşəbbüsü UNEC tələbələrinə yaratdığına görə “AzFinance Invest” şirkətinə və onun direktoru Abid Məmmədova təşəkkürünü çatdırıb. Ə.Muradov şirkət nümayəndələrinin universitetin geniş auditoriyasına master-klassların keçmələrini təklif edib. Təkliflər sırasında “AzFinance Invest” şirkətinin UNEC-də fənn tədrisini öz üzərinə götürməsi də olub.

Şirkətin direktoru Abid Məmmədov tələbələrə “AzFinance Invest”in xidmətləri barədə məlumat verib. Yerli və xarici bazarda törəmə maliyyə alətləri ilə aparılan əməliyyatlarından danışan şirkət rəhbəri qeyd edib ki, müştərilər dövriyyədə olan qiymətli kağızlar barədə bütün statistik məlumatları əldə etmək imkanına malikdir. Universitetlə əməkdaşlığa böyük ümidlər bəslədiyini qeyd edən Abid Məmmədov vurğulayıb ki, şirkətin bütün imkanlarından yararlanmaq üçün tələbələrə hər cür şərait yaradılacaq.

“AzFinance Invest” şirkətinin direktor müavini Murad Əhmədov qeyd edib ki, şirkət tələbələr üçün silsilə təlimlər keçirəcək. Ən yüksək nəticə göstərən tələbələrə adlı təqaüdlərin verilməsi nəzərdə tutulub. Həmin tələbələrin “AzFinance Invest” şirkətində karyera qurmaları üçün də şərait yaradılacaq.