Sabahdan V qrup üzrə ərizə qəbulu başlayır

Sabahdan 2016-2017-ci tədris ili üçün V qrup üzrə ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul imtahanlarında iştirak etmək üçün ərizə qəbulu başlayır.

Lent.az xəbər verir ki, ərizə qəbulu mayın 3-dən 17-dək davam edəcək. Tam orta təhsil müəssisələrini cari ildə bitirib V ixtisas qrupu üzrə ali təhsil müəssisələrinə və ya tam orta təhsil bazasında orta ixtisas təhsili müəssisələrinə qəbul olmaq istəyən abituriyentlər müvafiq qəbul imtahanı vermirlər, müsabiqədə buraxılış imtahanındakı nəticələri əsasında iştirak edirlər.

I-IV ixtisas qruplarından hər hansı biri üzrə ərizə verib həm də V ixtisas qrupunun və ya tam orta təhsil bazasında orta ixtisas təhsili müəssisələrinin ixtisasları üzrə müsabiqədə iştirak etmək istəyən abituriyentlər mayın 5-dən mayın 17-dək ikinci ödəmə kartı almadan elektron ərizə təqdim etməlidirlər.

Yalnız V ixtisas qrupunun və ya tam orta təhsil bazasında orta ixtisas təhsili müəssisələrinin ixtisasları üzrə təhsil almaq istəyən abituriyentlər ödəmə kartı əldə edib mayın 5-dən mayın 17-dək ərizə təqdim etməlidirlər.

Qeyd edək ki, əvvəlki illərin məzunları üçün V qrup üzrə qəbul imtahanı iyulun 5-də keçiriləcək.

Bundan başqa, xüsusi qabiliyyət tələb edən ixtisaslar üzrə elektron qeydiyyat (V qrup) 6-19 may tarixlərində aparılacaq. Bu ixtisaslar üzrə qabiliyyət imtahanı (V qrup) 15 iyul — 05 avqust tarixlərində baş tutacaq.