Rizede Qarabağ şəhidlərinə abidə qoyulması təklifi dəstəkləndi

Türkiyənin Rize vilayətində konfrans verməyə gedən millət vəkili Qənirə Paşayeva Rizə bələdiyyə başçısı Reşat Kasapla görüşüb. Lent.az-ın məlumatına görə, son günlər ön cəbhədə yaşanan hadisələrə toxunaraq, “Azərbaycanın şəhidi bizim də şəhidimizdir” deyən Rizə bələdiyyə başqanı Reşat Kasap Türkiyənin hər zaman qardaş Azərbaycanın yanında olduğunu deyib.

Görüş zamanı Azərbaycanla Türkiyənin bəzi şəhərlərinin və bələdiyyələrinin qardaş şəhərlər və bələdiyyələr olduğunu bildirərək, qədim Rizenin də Azərbaycan bölgələrindən biri ilə qardaş olaraq görmək istədiyini bildirən Qənirə Paşayeva “yaxın zamanlarda Rizənin mərkəzi parklardan birinə “Qarabağ” adının veriləcəyinə və orada şəhidlərimizin xatirəsinə “Şəhidlər” abidəsinin qoyulacağına, mərkəzi küçələrdən birinə isə Azərbaycan adının veriləcəyinə inandığını” deyib.

Bələdiyyə başçısı “hər zaman qardaş Azərbaycanın yanında olduğunu” deyib və Qənirə Paşayevanın Rizedə Azərbaycan küçəsi, Qarabağ parkı və Şəhidlər abidəsi ilə bağlı təkliflərini müsbət qiymətləndirdiyini bildirərək bu təkliflərə qısa zamanda mütləq baxılacağını və həllini tapacağını deyib.

Bələdiyyə başçısına müəllifi olduğu “Qənirə Paşayeva ilə addım-addım Türk dünyası” kitabı barədə danışan Qənirə Paşayeva kitabın növbəti hissələrində qədim Rizenin yer alacağını bildirib.

Q. Paşayeva Rize bələdiyyə başqanına Azərbaycan tarixi, mədəniyyəti və Qarabağ həqiqətləri ilə bağlı materiallar, həmmüəllifi olduğu “Karabağ hikayeleri”ni imzalı hədiyyə edib.