Prezidentin müşaviri xarici QHT rəhbərləri ilə görüşüb

Mayın 7-də Azərbaycan Respublikası millətlərarası, multikulturalizm və dini məsələlər üzrə dövlət müşaviri, akademik Kamal Abdullayev xarici ölkə QHT rəhbərlərindən ibarət nümayəndə heyəti ilə görüşüb.

Bakı Beynəlxalq Multikulturalizmm Mərkəzinin Mətbuat xidmətdən Lent.az-a verilən məlumata görə, görüşdə Kamal Abdullayev qonaqlara Azərbaycanda tarixən formalaşan multikulturalizm ənənələri, əsası mərhum prezident Heydər Əliyev tərəfindən qoyulan və bu gün də prezident İlham Əliyev tərəfindən davam və inkişaf etdirilən dövlət multikulturalizm siyasəti, Bakı Beynəlxalq Multikulturalizm Mərkəzinin yaradılması və həyata keçirdiyi layihələr barədə ətraflı məlumat verib, xarici QHT rəhbərlərini Multikulturalizm Mərkəzi ilə əməkdaşlığa dəvət edib. Xarici QHT rəhbərləri mayın 3-dən Azərbaycanda olmaları və bu müddət ərzində iştirak etdikləri toplantılarda Azərbaycanı daha yaxından tanıdıqlarını, burada yaşayan çoxsaylı etnik və milli qrupların birgə yaşayışlarına heyran olduqlarını bildiriblər.

Xatırladaq ki, görüşə qatılanlar 19 xarici ölkənin 30-dək QHT rəhbəri “Mədəni irsi qoruyaq-sülhlə gələcəyi təmin edək” devizi altında “Şuşaya azadlıq” beynəlxalq kampaniyasının xarici tərəfdaşlarının Bakı Toplantısının iştirakçılarıdır.

Kampaniyanın Azərbaycanda təşkilatçısı Azərbaycan Demokratik Tələbə Gənclər Təşkilatıdır.