Mehriban Əliyevanın təşəbbüsü ilə Pakistanda kimsəsizlər üçün iftar süfrələri açılıb

İyulun 9-da Azərbaycanın birinci xanımı, Heydər Əliyev fondunun prezidenti, UNESCO və İSESCO-nun xoşməramlı səfiri Mehriban xanım Əliyevanın təşəbbüsü və dəstəyi ilə Pakistan Nazirlər Kabinetinin nəzdində fəaliyyət göstərən “Pakistan Sweet Home” (Beyt-ul-Mal) təşkilatının Talassemiya Mərkəzində, həmçinin, Pakistanın Abbotabad və Lahor şəhərlərində kimsəsiz uşaqlar evlərində iftar süfrələri təşkil edilib. Lent.az-ın məlumatına görə, mərasimdə Pakistanın Neft və Təbii Sərvətlər Naziri Shahid Khaqan Abbasi, Hakim Pakistan Müsəlman Liqası partiyasının şimal bölgəsi üzrə prezidenti, Milli Assambleyanın komitə sədri Raca Muhammad Farooq, Bayt ul Malın direktoru Abid Vahid Şeyx, Senatorlar, Pakistanın nüfuzlu ictimai-siyasi xadimləri, KİV nümayəndələri, Talassemiya mərkəzdə müalicə alan uşaqlar, federal paytaxtda yerləşən uşaq evinin sakinləri, iştirak ediblər.

Tədbirdə çıxış edən Azərbaycanın səfiri Daşqın Şikarov, dövlətlərimiz arasında olan yüksək səviyyəli münasibətlərdən, iki qardaş xalqları biri birlərinə bağlayan ümumi dini, mədəni dəyərlər barəsində danışıb.

Heydər Əliyev Fondunun Bayt ul Malla əməkdaşlığının 2012-ci ildən başladığını bildirən Abdul Vahid Şeyx, M. Əliyevanın kimsəsiz uşaqlara dəfələrlə humanitar yardımlar etdiyini qeyd etmiş, Heydər Əliyev Fondunun Talassemiya Mərkəzinin tikilməsinə yardım etmiş ilk donor olduğunu xüsusi vurğulayıb.

Mərasim iştirakçıları üçün təşkil olunmuş iftar süfrəsindən sonra D. Şikarov Heydər Əliyev Fondu adından Talassemiya Mərkəzinə 500 ədəd qan paketi təqdim edib.

Daha sonra səfirin təşəbbüsü ilə qanvermə aksiyası keçirilib. Səfir, səfirliyin əməkdaşları və tədbirdə iştirak edən digər könüllü donorlar qan veriblər.

İftar yeməyi və qanvermə aksiyalarından sonra uşaq evlərinin sakinləri tərəfindən hazırlandığı səhnəciklər nümayiş etdirilib. Sonra konsert olub.

Qeyd edək ki, bu tədbir Pakistanın dövlət və özəl televiziya kanallarında nümayiş olunub, 30-dan çox qəzet və agentliklər tərəfindən işıqlandırılıb.