Ordumuzun 95-ci ildönümü Brüsseldə qeyd edilib

Azərbaycan Silahlı Qüvvələrinin yaranmasının 95-ci ildönümünün qeyd edilməsi məqsədilə Brüssel şəhərində rəsmi qəbul keçirilib.

Lent.az-ın məlumatına görə, rəsmi qəbulu Azərbaycanın NATO yanında nümayəndəliyi və onun tərkibində fəaliyyət göstərən Azərbaycan Silahlı Qüvvələrinin NATO-nun Hərbi Komitəsi yanında Hərbi Nümayəndəliyi Azərbaycanın Belçikadakı səfirliyi ilə birlikdə təşkil edib.

Azərbaycanın dövlət himninin səsləndirilməsindən sonra tədbirdə Azərbaycanın NATO yanında nümayəndəliyinin başçısı, Azərbaycanın Belçikadakı səfiri və hərbi nümayəndə açılış nitqi söyləyib. Qonaqlar Azərbaycan Silahlı Qüvvələrinin yaranması, inkişafı tarixi və onun beynəlxalq sülhməramlı əməliyyatlara töhfəsi barədə məlumatlandırıblar. Azərbaycanın beynəlxalq sülh və təhlükəsizliyin qorunmasında inamlı tərəfdaş olması xüsusilə qeyd olunub.

Qəbul zamanı Azərbaycan bəstəkarlarının simfonik əsərləri səsləndirilib, Azərbaycan və onun Silahlı Qüvvələri barədə video materiallar nümayiş etdirilib. Qonaqlara Azərbaycan mətbəxinin nümunələri təqdim olunub.