Google telefon nömrənizi xəbəriniz olmadan istifadə edir: necə deaktiv etmək olar

Bir neçə Google hesabından istifadə edən Android telefon sahiblərinə nömrənin avtomatik təsdiqlənməsi ayarını yoxlamaq tövsiyə olunur. Bu funksiya telefondakı nömrəni cihazda istifadə edilən müxtəlif hesablara bağlaya bilər.

Lent.az xarici mediaya istinadla xəbər verir ki, avtomatik yoxlama aktiv olduqda SIM kartın nömrəsi telefonda daxil olduğunuz Google hesabları ilə əlaqələndirilə bilər.

Bu, sonradan əlavə edilən hesablara da aid ola bilər. Nömrə dəyişdikdə isə yeni nömrənin həmin profillərlə əlaqələndirilməsi mümkündür.

Bəzi istifadəçilər bu xüsusiyyətdən Google-un nömrənin təsdiqlənməsi barədə göndərdiyi bildirişlərdən sonra xəbər tutublar.

Funksiya nə üçün nəzərdə tutulub?

Nəşrin məlumatına görə, nömrənin təsdiqlənməsi hesaba girişin bərpası, telefon nömrəsi ilə daxilolma və RCS mesajlaşması kimi xidmətlərin işini asanlaşdırmaq məqsədi daşıyır.

Avtomatik əlaqələndirmə hesabları ictimai etmir və onların məzmununu birləşdirmir. Lakin eyni nömrənin müxtəlif profillərdə istifadə olunması şəxsi və iş fəaliyyətini ayrı saxlamaq istəyənlər üçün arzuolunmaz ola bilər.

Avtomatik yoxlamanı necə söndürmək olar?

Məqalədə göstərilən qaydaya əsasən, telefonun “Parametrlər” bölməsindən “Google” menyusuna, daha sonra “Bütün xidmətlər” — “All services” hissəsinə keçmək lazımdır.

“Məxfilik və təhlükəsizlik” - “Privacy & Security” bölməsində “Telefon nömrəsinin təsdiqlənməsi” - “Phone number verification” seçimini taparaq “Nömrələri avtomatik təsdiqlə” - “Verify phone numbers automatically” parametrini söndürmək olar.

Menyu adları telefonun istehsalçısından və Android versiyasından asılı olaraq fərqlənə bilər. Seçimi tapa bilmədikdə parametrlərin axtarış hissəsinə “Phone number verification” yazmaq təklif olunur.

Əvvəldən əlavə edilmiş nömrə silinmir

Avtomatik yoxlamanın söndürülməsi nömrəni artıq əlaqələndirildiyi hesablardan silmir. Bunun üçün hər Google hesabının əlaqə məlumatlarına ayrıca baxmaq və nömrəni lazım olmayan profildən çıxarmaq lazımdır.

Nömrəni silməzdən əvvəl onun hesabın bərpası və təhlükəsizlik yoxlamaları üçün istifadə olunub-olunmadığını nəzərdən keçirmək vacibdir.

Məqalədə bəzi istifadəçilərin söndürdükləri ayarın sonradan yenidən aktivləşdiyini bildirdikləri də qeyd olunur. Buna görə parametrin vəziyyətini vaxtaşırı yoxlamaq tövsiyə edilir.