Moskva Dövlət Beynəlxalq Əlaqələr Universitetinə tələbə qəbulu elan edildi

2015/2016-cı tədris ili üçün Rusiya Federasiyası Xarici İşlər Nazirliyinin Moskva Dövlət Beynəlxalq Əlaqələr Universitetinə Azərbaycan Respublikası vətəndaşları üçün tələbə qəbulu elan edilib.

TQDK-ın mətbuat xidmətindən Lent.az-a verilən məlumata görə, Moskva Dövlət Beynəlxalq Əlaqələr Universitetində yerli vətəndaşlarımızın təhsil alması üçün 3 yer ayrılıb.

May ayının 15-dək 19 yaşı tamam olmayan, II və III ixtisas qrupları üzrə ali təhsil müəssisələrinə müvafiq qaydada elektron ərizə təsdiq etmiş, attestat qiymətləri (cari ilin məzunlarının birinci yarım il üzrə qiymətləri) 4 və 5 olan Azərbaycan Respublikasının vətəndaşları bu müsabiqədə iştirak etmək hüququna malik olacaqlar.

Ali məktəb tələbəsi və ya məzunu olan şəxslər bu müsabiqədə iştirak etmək hüququna malik deyillər.

Müsabiqədə iştirak etmək istəyən abituriyentlər TQDK-da təşkil edilmiş Sənəd Qəbulu Komissiyasında (SQK) qeydiyyatdan keçməlidirlər

Qeydiyyat 2015-ci il may ayının 7-dən (şənbə, bazar və bayram günləri istisna olmaqla) may ayının 14-ü saat 15:00-dək aparılacaq.

Müsabiqənin birinci mərhələsində iştirakçılar “Beynəlxalq iqtisadi əlaqələr” və “Beynəlxalq münasibətlər” ixtisasına qəbul olmaq istəyənlər II ixtisas qrupu üzrə, “Beynəlxalq hüquq” ixtisasına qəbul olmaq istəyənlər III ixtisas qrupu üzrə test imtahanında iştirak edəcəklər.

Test imtahanı nəticəsində 500 və daha yüksək bal toplayan, xarici dil fənnindən nisbi balı 50-dən az olmayan abituriyentlər müsahibəyə buraxılacaqlar. Müsahibə 2015-ci il may ayının 21-də keçiriləcək. Müsahibədə abituriyentlərin ümumi dünyagörüşü yoxlanacaq.

Müsabiqədə ən yüksək nəticə göstərən 3 nəfərin namizədliyi MDBƏİ-yə ödənişsiz təhsil forması üzrə təhsil alması üçün təqdim olunacaq.

İkinci mərhələ MDBƏİ tərəfindən Moskva şəhərində cari il iyun ayının 26-da və 30-da aparılacaq.