DGK ölkəyə gətirilən saxta qadın ayaqqabısı xəbərlərinə münasibət bildirib

Dövlət Gömrük Komitəsi mətbuatda “Azərbaycan gömrüyündə şok hadisə” başlığı ilə yayılan Türkiyədən Azərbaycana gətirilən saxta qadın ayaqqabısı xəbərlərinə münasibət bildirib.

Komitənin mətbuat xidmətindən Lent.az-a verilən məlumatda deyilir ki, bu gün bəzi kütləvi informasiya vasitələrində “Azərbaycan gömrüyündə şok hadisə” başlıqlı yalan, böhtan xarakterli, həqiqətə uyğun olmayan məlumatlar yer alıb.

Məlumatda qeyd olunur ki, Türkiyədən Azərbaycana gətirilən 10 tonluq, 200 min dollarlıq qadın ayaqqabısı saxta sənədlərlə Rusiyaya aparılmaq adı altında guya Bakıda rəsmiləşdirilir.

Komitədən xatırlatma olaraq bildirilir ki, martın 30-da “Samur” gömrük postunda, Gürcüstan Respublikasından Rusiya Federasiyasına tranzit gömrük proseduru altında gedən “Mersedes Benz Atgeo” markalı, 99 XA 965 dövlət nömrə nişanlı yük avtomobilinə keçirilmiş gömrük baxışı zamanı, 10.150 kq. çəkidə rezin tərliklər yükünün Türkiyədə istehsal olduğu müəyyən edilib. Lakin müşayiət sənədlərində yükün Gürcüstan istehsalı olduğu qeyd edilib.

Məsələ ilə bağlı Xaçmaz Gömrük İdarəsində sorğu-sual olunan sürücü Hüseynov Niyaməddin Əliheydər oğlu bildirib ki, o, idarə etdiyi “Mersedes Benz Atgeo” markalı, 99 XA 965 dövlət nömrə nişanlı yük nəqliyyat vasitəsilə Gürcüstan Respublikasının Tiflis şəhərindən rezin tərliklər yükü götürərək, martın 30-da “Sınıq Körpü” gömrük postundan keçməklə “tranzit” gömrük prosedurunda Azərbaycana daxil olub. Həmin gün təyinatı üzrə Rusiyaya getmək üçün “Samur” gömrük postuna gəlib. Burada yükə aid müşayiətedici sənədləri gömrük işçisinə təqdim etdikdən sonra yükə keçirilən baxış zamanı, rezin tərliklər yükünün Gürcüstan istehsalı deyil, Türkiyə istehsalı olduğunu müəyyən edilib. Hüseynov Niyaməddin Əliheydər oğlu yükü qəbul edərkən yanında olduğunu, lakin tərliklər olan bağlamaların üzərindəki yazılara fikir vermədiyini və bu səbəbdən də Türkiyə istehsalı olduğunu bilməyib.

Beləliklə də, Hüseynov Niyaməddin Əliheydər oğlu tranzit gömrük proseduru altında apardığı yüklə bağlı düzgün olmayan məlumatlar verib.

Bununla da, Hüseynov Niyaməddin Əliheydər oğlu Azərbaycan Respublikası İnzibati Xətalar Məcəlləsinin 482.3-cü maddəsində nəzərədə tutulan inzibati xətaya yol vermiş sayılır.

Komitədən bildirilir ki, yuxarıda göstərilənlər nəzərə alınaraq Azərbaycan vətəndaşı Hüseynov Niyaməddin Əliheydər oğlu İnzibati Xətalar Məcəlləsinin müvafiq maddəsi ilə nəzərdə tutulmuş inzibati xətanı törətməkdə təqsirli bilinməklə 300 manat məbləğində cərimə edilmiş, yük sənədlərində düzəliş edilməsi üçün geri qaytarılması qərara alınıb.

Həmin yükün təcili olaraq Bakıya aparılaraq Bakı Baş Gömrük İdarəsinin həyətində gömrük yoxlamasından keçirilməsinə də münasibət bildirən Gömrük Komitəsindən qeyd edilib ki, müvafiq qanunvericiliyə uyğun olaraq cərimə ödənildikdən sonra yük maşını “Samur” gömrük postunun terminalına yönləndirilmiş və hal hazırdada o terminaldadır və görünən də odur ki, yük sahibi avtomobili hələ də terminaldan çıxarmaq fikrində deyil.

Məsələ ilə bağlı DGK Mətbuat Xidmətinə verilən sorğuyla bağlı fikir bildirən Komitə bəzi dırnaqarası qələm sahiblərinə müraciət ediblər: “İnformasiya əldə etmək haqqında Azərbaycan Respublikası Qanunu”nun 24.1 maddəsinə əsasən informasiya sorğusu ən qısa müddətdə, lakin 7 iş günündən gec olmayaraq icra edilir. Həmin qanunun 24.5 maddəsinə görə isə informasiya sorğusunun bu Qanunla müəyyənləşdirilmiş icra müddəti sorğunun qeydə alındığı günün sonrakı iş günündən hesablanır.

Dövlət Gömrük Komitəsinə bu barədə sorğu aprel ayının 26-da saat 17 radələrində, iş gününün sonunda 195 çağrı mərkəzinin xəttilə daxil olub. Sorğu araşdırma tələb etdiyindən onu göndərən şəxsə də bu barədə ətraflı izahat verilib, aprelin 27-də günün birinci yarısında sorğunun cavablındırılacağı bildirilib. Lakin sorğunu göndərən şəxs qanunun tələblərini nəzərə almadan, qarşı tərəfin mövqeyini dəqiqləşdirmədən məlumatı yaymaqla ictimailəşdirib və dolayısı ilə qanunvericiliyin tələblərini pozub. Yalan və böhtan xarakterli məlumat yayan bu informasiya portalı qanun qarşısında cavab verəcək.

Sonda Dövlət Gömrük Komitəsi bir daha bütün media qurumlarını və onların əməkdaşlarını fəaliyyətləri zamanı qərəzsizliyə, peşəkarlığa, olkə qanunlarına hörmət etməyə çağırıb.