AMEA-dan gənc alimlərə şad xəbər

Azərbaycan Milli Elmlər Akademiyası (AMEA) Rəyasət Heyəti “Gənclər üçün Prezident Mükafatının təsis edilməsi haqqında” fərmanın icrası barədə sərəncam imzalayıb. Bu barədə Lent.az-a AMEA-dan məlumat verilib. Belə ki, gənclərin elm, mədəniyyət, o cümlədən ədəbiyyat və incəsənət, təhsil və ictimai fəaliyyət sahələrində nailiyyətlərini təşviq etmək məqsədilə prezidentin imzaladığı fərmandan irəli gələn vəzifələrin yerinə yetirilməsi istiqamətində Azərbaycan Milli Elmlər Akademiyası Rəyasət Heyəti Sərəncam verib.

Sərəncama əsasən, AMEA-nın elmi-tədqiqat müəssisələrinin rəhbərlərinə “Gənclər üçün Prezident Mükafatının Əsasnaməsi”ni rəhbər tutaraq elmdə əldə etdikləri yüksək nailiyyətləri ilə fərqlənən gənc alimlərin namizədliyini elmi şuralarda müzakirə edərək oktyabrın 1-dək elmi bölmələrə təqdim etmək tapşırılıb.

Həmçinin AMEA-nın elmi bölmələrinin akademik-katibləri elmi-tədqiqat müəssisələrinin “Gənclər üçün Prezident Mükafatı”na təqdim etdikləri gənc alimlərin namizədliyinin bölmə bürolarında müzakirə edərək, 20 oktyabr tarixinədək AMEA Rəyasət Heyətinə təqdim etməlidirlər.