Ən qidalı qatıqlar bunlardır - ARAŞDIRMA

Massaçusets Amherst Universitetinin alimləri müəyyən ediblər ki, badam südlü qatıq inək südündən daha çox qida dəyərinə malikdir.

Lent.az xəbər verir ki, alimlərin fikrincə, bitki əsaslı qatıqlar, ümumiyyətlə, süd məhsulları ilə müqayisədə daha az şəkər, daha az natrium və daha çox lif ehtiva edir. Lakin tərkiblərində südlü qatıqlardan daha az protein, kalsium və kalium var.

Lakin “Mintel”in yeni məhsullar üzrə qlobal məlumat bazasından 612 qatığın qida dəyərini müqayisə edərək, tədqiqatçılar aşkar ediblər ki, badamlı qatıq südlü qatıq və digər bitki əsaslı qatıqlardan əhəmiyyətli dərəcədə yüksək qida sıxlığına malikdir. Yulaf, az yağlı süd məhsulları, tam yağlı süd məhsulları, anakardiya əsaslı qatıq və nəhayət, hindistan cevizi südünə əsaslanan qida sıxlığına görə sonrakı yerləri tutur.

Badam və yulaf qatıqlarının yüksək nisbətləri ümumi şəkər, natrium və doymuş yağın aşağı səviyyələri ilə əlaqələndirilir. Tədqiqatın nəticələri bitki mənşəli qatıqların resepturası və qida tərkibini yaxşılaşdırmağa kömək edəcək. Tədqiqatçıların təklif etdiyi variantlardan biri hibrid bitki və süd əsaslı qatıq yaratmaqdır. Bu, ümumi şəkər, natrium və doymuş yağları minimuma endirərkən protein, vitamin B12 və kalsiumu artıracaq.

Ətraf mühitin davamlılığı və heyvan mənşəli məhsulların istehlakının azalması ilə bağlı narahatlıqlar səbəbindən bitki əsaslı qatıq bazarının 2021-ci ildəki 1,6 milyard dollardan 2030-cu ildə 6,5 milyard dollara qədər artacağı gözlənilir.