Kilimancaroya yürüş 25 min manata başa gəlib

Ekspedisiya qrupunun 8 günlük yürüşü özəl mənbələrdən maliyyələşib

“Dünyanın 7 ən yüksək zirvələrindən biri olan Kilimancaro dağına səfərinə təxminən 25 min manata başa gəlib. Bu vəsaitin hamısı özəl mənbələrdəndir, dövlətin bir qəpiyini də xərcləməmişik”.

Lent.az-ın məlumatına görə, ekologiya və təbii sərvətlər naziri, Azərbaycan Hava və Ekstremal İdman Növləri Federasiyasının prezidenti Hüseyn Bağırovun başçılıq etdiyi ekspedisiya qrupu avqustun 11-də Kilimancaro dağına başladığı yürüşün nəticələri barədə keçirdiyi mətbuat konfransında belə deyib. O, qeyd edib ki, elmi, siyasi, idman və rəmzi əhəmiyyət daşıyan ekspedisiya üçün 10 gün məzuniyyət götürüb. Səfər isə cəmi 9 gün çəkib.

Ekspedisiyanın təkcə idman deyil, həm də elmi, siyasi əhəmiyyət daşıdığını deyən Hüseyn Bağırovun sözlərinə görə, bu yürüş Azərbaycandan olan ekspediyisiya qrupunun ilk yürüşüdür: “Biz sübut etdik ki, Norveç, Almaniya və gər ölkələr kimi Azərbaycan idmançıları da bunu edə bilər. Yürüşün elmi əhəmiyyətinə gəlincə, biz çoxlu geoloji və bioloji müşahidələr aparmışıq. Ekspedisiyanın topladığı geoloji materiallar 3 ay tədqiq olunacaq və bundan sonra həmin materiallar Bakı Dövlət Universitetinin muzeyinin Afrika bölməsinə təqdim olunacaq”.

Hüseyn Bağırov onu da deyib ki, ekspedisiya qrupunda 7 nəfər təmsil olunub. Onların arasında “Salavat” İdman Klubunun rəhbəri İlqar İsrafilov, “A+A” İdman Klubunun rəhbəri Adil Fərəcullayev, həkim və dağ idmançısı Eldar Ələkbərov, Alpinizm Federasiyasının nümayəndəsi Yaqub Əsədov, bioloq Azərçin Muradov , operator Teymur Nəcəfzadə də olub.

Elxan SALAHOV